कळमनुरी तालुक्यातील जवळा पांचाळ गावात यंदा पावसाचे प्रमाण कमी राहिले. त्यामुळे शेतकऱ्यांसमोर शेतीच्या सिंचनाचा मोठा प्रश्न निर्माण झाला आहे. पाण्याची टंचाई असतानाही गावातील शेतकरी न डगमगता रब्बी हंगामातील पिकांसाठी मेहनत घेत आहेत. उपलब्ध पाण्यावर त्यांनी रब्बी पिकांची लागवड केली आहे.
दवबिंदूंवर सूर्याची सोनेरी किरणे
परिसरात काही दिवसांपासून गारवा वाढला आहे. सकाळी शेतात पिकांवर दवबिंदू जमा होतात. उगवत्या सूर्याची कोवळी किरणे या दवबिंदूंवर पडताच शेतांमधून सोनेरी चमक उजळते. तुरीच्या हिरव्या टवटवीत पानांवर पडलेले दवबिंदू सूर्यप्रकाशात चमकून संपूर्ण शिवाराला निसर्गसौंदर्याची अनोखी झळाळी देत आहेत.
थंडी काही पिकांसाठी पोषक
गेल्या काही दिवसांपासून वाढलेली थंडी काही पिकांसाठी पोषक ठरत आहे. दुष्काळाच्या परिस्थितीतही शेतकऱ्यांनी जिद्दीने शेती सुरू ठेवली असून, सकाळच्या दवबिंदूंनी फुललेले शिवार गावकऱ्यांचे लक्ष वेधून घेत आहे.
Leave a Reply