धुळे ग्रामीणचे माजी आमदार प्रा. डॉ. शरद पाटील यांच्या संकल्पनेतील शेतकरी आत्महत्या भाऊबीज सांत्वन यात्रा यंदा २१ व्या वर्षात पोहोचली. ११ नोव्हेंबरला पार पडलेल्या या यात्रेत प्रा. डॉ. पाटील आणि त्यांच्या सहकाऱ्यांनी गावोगावी जाऊन आत्महत्याग्रस्त कुटुंबीयांतील माता-भगिनींना साडी-चोळीचा आहेर देत त्यांचे सांत्वन केले.
जिल्ह्यातील आकडेवारी
२००५ पासून जिल्ह्यात सुमारे एक हजार ४०० शेतकरी आत्महत्यांची नोंद आहे. नोव्हेंबर २०२५ ते ऑक्टोबर २०२६ या वर्षभरात जिल्ह्यात ६४ शेतकऱ्यांनी आत्महत्या केल्या. यात धुळे तालुक्यातील ३३, शिंदखेडा तालुक्यातील २०, साक्री तालुक्यातील ८ आणि शिरपूर तालुक्यातील ३ शेतकऱ्यांचा समावेश आहे.
या ६४ प्रकरणांपैकी २८ प्रकरणे पात्र, दहा अपात्र आणि २२ प्रलंबित आहेत, तर चार प्रकरणे गोपीनाथ मुंडे अपघात विमा योजनेकडे वर्ग करण्यात आली आहेत. यामध्ये एका महिला शेतकऱ्याचाही समावेश आहे. अपात्र प्रकरणांची फेरचौकशी करून प्रलंबित प्रकरणे तातडीने निकाली काढावीत, अशी मागणी प्रा. डॉ. पाटील यांनी केली.
शेतकऱ्यांना धीर धरण्याचे आवाहन
एल-निनो आणि कोरड्या दुष्काळामुळे आगामी २५ महिने शेतकऱ्यांसाठी धोक्याचे असून, शेतकऱ्यांनी धीर धरावा आणि समाजाने त्यांच्या पाठीशी उभे राहावे, असे आवाहन प्रा. डॉ. पाटील यांनी केले. या यात्रेत आंबोडे, बोरकुंड, नाणे, तरवाडे, सातरणे आणि ढाडरे आदी गावांतील कुटुंबांना भेटी देण्यात आल्या.
या वेळी भय्या गर्दे, आबा मदने, बन्सीलाल माळी, खंडू गुरुजी, मनोहर अहिरे, प्रवीण गुरव, धर्मराज भदाणे, दीपक भदाणे, हिलाल गढरी, नरेंद्र जगताप, कल्याणसिंग राजपूत, बापू रावळ, नवलसिंग राजपूत, एकनाथ राजपूत, भगवान जगताप, अमोल राजपूत, भावसिंग राजपूत, प्रा. एस. एन. पाटील, विजय बोरसे आणि भावेश देवरे उपस्थित होते.
Leave a Reply