मराठी मनोरंजनविश्वातील लोकप्रिय अभिनेता संकर्षण कऱ्हाडे आपल्या अभिनयासोबतच विनोदी स्वभावासाठीही ओळखला जातो. नाटक, मालिका, चित्रपट आणि सूत्रसंचालन अशा विविध माध्यमांतून त्याने प्रेक्षकांची मने जिंकली आहेत. मुलाखतींमधून तो अनेकदा आपल्या आयुष्यातील मजेशीर आठवणी आणि किस्से सांगत असतो. असाच एक भन्नाट किस्सा त्याने बालपणीच्या आठवणींना उजाळा देताना सांगितला. या किस्स्यात त्याने वडिलांच्या एटीएममधून केलेल्या ३०० रुपयांच्या चोरीची आठवण सांगितली आहे.
एटीएमचा पासवर्ड फक्त मलाच माहीत होता
संकर्षण म्हणाला की, नवीन नवीन एटीएम कार्ड आले होते. वडिलांच्या एटीएमचा पासवर्ड अख्ख्या घरात फक्त त्यालाच माहीत होता; वडिलांनाही तो माहीत नव्हता. नागपंचमीला त्याचे आजोबा त्याच्या आईला हमखास साडी घ्यायचे. एकदा आजोबा त्याला म्हणाले, ‘मन्या, जरा एटीएमला जा, पैसे घेऊन ये.’ किती काढायचे, असे विचारले असता आजोबा म्हणाले, ‘५०० काढ.’ संकर्षण एटीएममध्ये गेला, कार्ड टाकले आणि त्याला वाटले की हीच ती संधी आहे. त्याने आधी ३०० रुपये काढले, पावती फाडून टाकली आणि ३०० रुपये खिशात ठेवले. मग ५०० रुपये काढले, त्याची पावती घेतली आणि घरी आला. आजोबांना त्याने ५०० रुपये दिले. आजोबांनी ते पैसे त्याच्या आईकडे ठेवून दिले. ‘चोरी मिटली, विषय संपला,’ असे त्याला वाटले.
संध्याकाळी वडील घरी आले…
संध्याकाळी त्याचे वडील घरी आले. वडील आजोबांना म्हणाले, ‘बाबा, तुम्ही आज ८०० कसे काय काढले?’ हे ऐकल्यावर संकर्षणला जो घाम फुटला होता, तो ३०० रुपयांचा घाम आपण मरेपर्यंत विसरू शकत नाही, असे तो म्हणाला. त्यावेळी तो पदवीधरही नव्हता; अकरावी-बारावीत असेल. आजोबा वडिलांना म्हणाले, ‘नाही हो गिरीशराव, बरोबर आहे. तुम्ही जा आता, हात पाय धुऊन घ्या.’ आजोबा त्याच्या वडिलांना ‘अहो जाओ’ म्हणायचे. त्यांना सगळे लक्षात आले होते.
वडील आत गेल्यावर आजोबांनी संकर्षणला हाक मारली. तो त्यांच्याजवळ गेला. आजोबा म्हणाले, ‘साहेब, ३०० कुठे आहेत?’ संकर्षण म्हणाला, ‘मी उडवले.’ आजोबा म्हणाले, ‘हरकत नाही. फक्त एटीएममधून चोरी करताना आपला बाप त्याच बँकेमध्ये मॅनेजर आहे, याचे तरी भान ठेवावे.’ त्याचे वडील त्याच बँकेत मॅनेजर होते. आजोबा पुढे म्हणाले, ‘तुझेच पैसे आहेत, तू ३०० नाही, ३००० काढ.’ हा किस्सा संकर्षणने एका मुलाखतीत सांगितला होता.
Leave a Reply