शेवटच्या चेंडूवर चौकार; मोहित उलवाने जिंकवला आशिया चषक

भारतीय क्रिकेटच्या चाहत्यांसाठी आजचा दिवस मोठा ठरला आहे. टीम इंडियाच्या अंडर-१९ संघाने आशिया चषकाचा अंतिम सामना जिंकला आहे. हा सामना अतिशय रोमांचक झाला. सामन्याच्या शेवटच्या चेंडूवर टीम इंडियाने पाकिस्तानला पराभूत केलं. एक गडी राखून भारताने आशिया चषक पटकावला आहे. या सामन्यात सर्वांचं लक्ष वेधलं ते मोहित उलवा या युवा खेळाडूने. त्याच्या जिद्दीच्या जोरावर भारताने हा थरारक विजय मिळवला आहे.

शेवटच्या चेंडूवर विजयी चौकार

पाकिस्तानने या सामन्यात भारतासमोर ३३८ धावांचं मोठं लक्ष्य ठेवलं होतं. भारताला शेवटच्या चेंडूवर तीन धावांची आवश्यकता होती. असे असताना मोहितने चौकार मारला आणि संघाला विजय मिळवून दिला. मोहित उलवाने देशांतर्गत स्पर्धांमध्येही आपल्या खेळाने सर्वांना प्रभावित केलं आहे. आपल्या फलंदाजीतील कौशल्य त्याने वेळोवेळी दाखवलं आहे. दबावाच्या वेळी कशा पद्धतीने खेळायचं हे त्याच्या आजच्या खेळीतून सिद्ध झालं आहे. त्याने खेळलेल्या शेवटच्या चेंडूमुळेच भारताला या थरारक सामन्यात विजय मिळवता आला आहे.

मोहित उलवाचा प्रवास

सौराष्ट्रच्या वयोगटातून प्रवास करत मोहित हा अंडर-१९ संघामध्ये पोहोचला. मोहितने क्रिकेट विश्वात सुरुवात केली तेव्हा तो टेनिस बॉल क्रिकेट खेळत होता. त्याचे वडील रेल्वे आरपीएफ पोलीस आहेत. त्यांनीच मोहितला क्रिकेटमध्ये करिअर करण्यासाठी प्रोत्साहन दिलं आणि अकादमीत पाठवलं, जिथे त्याने क्रिकेटचे धडे घेतले. तो गुजरातच्या जामनगरमधील क्रिकेट बंगलो या अकादमीमध्ये महेंद्र सिंग यांच्या मार्गदर्शनाखाली खेळ शिकला. महेंद्र सिंग चौहान हे मोठं नाव आहे. त्यांनी रवींद्र जडेजालाही प्रशिक्षण दिलं आहे. सुरुवातीला मोहित ऑफ स्पिन गोलंदाजी करत असे. मोहित उंच असल्याने आणि चांगला धावत असल्याने प्रशिक्षकांनी त्याला वेगवान गोलंदाजी करण्यासाठी सल्ला दिला.