वीरेंद्र सेहवाग यांचा मुलगा आर्यवीर सेहवाग अंडर 19 आशिया कपच्या निमित्ताने चर्चेत आला आहे. अंडर 19 संघात त्याची निवड झाल्यापासून त्याच्या कामगिरीबद्दल अनेकांना उत्सुकता होती. ऑस्ट्रेलियाविरुद्धच्या यूथ वनडे मालिकेत त्याने आपल्या फलंदाजीची झलक दाखवली होती. मात्र तो काय दर्जाचा फलंदाज आहे, हे त्याने अंडर 19 आशिया कपमध्ये सिद्ध करून दाखवले.
ओमानमध्ये ही अंडर 19 आशिया कप स्पर्धा होत आहे. वीरेंद्र सेहवाग आक्रमक आणि स्फोटक फलंदाज म्हणून ओळखले जात. आर्यवीरनेही वडिलांच्या पावलावर पाऊल टाकत ओपनिंगची जबाबदारी सांभाळली आणि स्पर्धेच्या प्रत्येक सामन्यात जबरदस्त फलंदाजी केली. पाकिस्तानविरुद्धच्या अंतिम सामन्यात वेदना होत असूनही त्याने अर्धशतक झळकावले आणि संघाला दमदार सुरुवात करून दिली.
एका आवृत्तीतील सर्वाधिक धावा
शनिवारी झालेल्या अंतिम सामन्यात आर्यवीरने 58 धावांची दमदार खेळी केली. या आशिया कपमध्ये त्याने पाच डावांत 361 धावा केल्या आणि एका आवृत्तीतील सर्वाधिक धावांचा नवा विक्रम आपल्या नावावर केला. त्याने एक शतक आणि तीन अर्धशतके झळकावली. पाचपैकी चार डावांत त्याने 50 पेक्षा जास्त धावा केल्या. त्याची सरासरी 90.25 आणि स्ट्राइक रेट 95.50 इतका होता. त्याने 38 चौकार आणि 16 षटकार लगावले.
विक्रमाची चुरस उस्मान खानसोबत
याआधी हा विक्रम पाकिस्तानच्या समीर मिन्हासच्या नावावर होता. त्याने मागच्या आशिया कपमध्ये 294 धावा केल्या होत्या. आर्यवीरने उपांत्य सामन्यातच हा विक्रम मोडला होता. मात्र अंतिम सामन्यात पाकिस्तानच्या उस्मान खानने शतक झळकावून 345 धावा केल्या आणि विक्रम आपल्या नावावर केला. त्यानंतर आर्यवीरने पुन्हा एकदा दमदार खेळी करत उस्मानला मागे टाकले आणि विक्रम आपल्या नावावर केला.
Leave a Reply