उन्हाळा आणि पावसाळा या दोन ऋतूंमध्ये सापांचा धोका वाढतो. हिवाळ्यात साप थंडीमुळे बिळात दडून बसतात, त्यामुळे त्या काळात धोका कमी असतो. मात्र उन्हाळ्यात आणि पावसाळ्यात साप बिळात कमी आणि जमिनीवर जास्त दिसतात.
उन्हाळा आणि पावसाळ्यात साप का बाहेर येतात?
साप हा थंड रक्ताचा प्राणी आहे. उन्हाळ्यात जमिनीचे तापमान वाढते, त्यामुळे बिळात सापांना उष्णतेचा त्रास होतो. पावसाळ्यात बिळात पाणी शिरते, तर जोरदार पावसामुळे वाहून आलेली माती बिळं बुजवते. अशा वेळी साप निवाऱ्यासाठी सुरक्षित जागा शोधतात. जिथे जास्त आर्द्रता, अंधार आणि लपण्यासाठी सुरक्षित जागा असेल, तिथे ते आश्रय घेतात. घरात असे वातावरण मिळाले, तर साप घरातही लपू शकतात.
कांदा-लसणाची युक्ती कशी वापरावी?
सर्पमित्रांच्या मते, सापांना मसाल्यांचा तीव्र वास सहन होत नाही. कांदा आणि लसूण यांसारख्या पदार्थांपासून साप दूर राहतात. जिथे साप लपण्याची शक्यता वाटते किंवा जिथून साप घरात येऊ शकतो, तिथे कांद्याचे छोटे काप ठेवता येतात. लसणाच्या पाकळ्याही ठेवता येतात. या वासामुळे साप घरापासून दूर राहतात, असे सर्पमित्र सांगतात.
साप दिसल्यास काय करावे?
घरात किंवा कुठेही साप दिसला, तर त्याला पकडण्याचा किंवा मारण्याचा प्रयत्न करू नये. तो साप विषारी आहे की बिनविषारी, हे आपल्याला माहीत नसते. अशा वेळी सर्पमित्रांना माहिती द्यावी. ते सापाला सुरक्षितपणे पकडून त्याची सुटका करतात.
स्रोत: मूळ बातमी
Leave a Reply