होम्बळे फिल्म्स आणि ट्रान्सेंडेंटल फिल्म्स यांनी ‘शरणागती – द लाइफ ऑफ अ सरेंडर्ड सोल’ या महत्त्वाकांक्षी अॅनिमेटेड चित्रपटाची घोषणा केली आहे. इंटरनॅशनल सोसायटी फॉर कृष्णा कॉन्शसनेस अर्थात इस्कॉनचे संस्थापक-आचार्य ए. सी. भक्तिवेदांत स्वामी श्रील प्रभुपाद यांच्या जीवनप्रवासावर आणि आध्यात्मिक कार्यावर हा चित्रपट आधारित आहे. अत्याधुनिक एआय मोशन कॅप्चर तंत्रज्ञानाचा वापर करून हा अॅनिमेशनपट तयार करण्यात आला आहे.
एआय मोशन कॅप्चर तंत्रज्ञानाचा वापर
कृत्रिम बुद्धिमत्ता आणि कॉम्प्युटर व्हिजन यांची सांगड घालणारे हे उदयोन्मुख तंत्रज्ञान मानवी हालचालींचे डिजिटल अॅनिमेशनमध्ये रूपांतर करते. कॅमेऱ्यांच्या माध्यमातून मानवी हालचालींची नोंद केली जाते. त्यानंतर कृत्रिम बुद्धिमत्तेच्या साहाय्याने शरीराची स्थिती, सांध्यांच्या हालचाली, हावभाव आणि चेहऱ्यावरील भाव यांचा मागोवा घेतला जातो. या हालचालींशी संबंधित माहितीचे डिजिटल अॅनिमेशन डेटामध्ये रूपांतर करून ती थ्रीडी पात्राच्या डिजिटल सांगाड्याशी जोडली जाते. त्यामुळे अॅनिमेटेड पात्र मानवी हालचाली हुबेहूब साकारू शकते. नैसर्गिक आणि भावपूर्ण अॅनिमेशनसाठी आवश्यक सुधारणा केल्यानंतर हे तंत्रज्ञान प्रेक्षकांना अधिक प्रभावी दृश्यानुभव देते. तंत्रज्ञान, अॅनिमेशन आणि आध्यात्मिक आशय असलेल्या कथाकथनाचा हा एक अभिनव संगम असल्याचे सांगण्यात आले आहे.
प्रभुपाद यांचा प्रेरणादायी प्रवास
या चित्रपटात श्रील प्रभुपाद यांच्या असामान्य जीवनप्रवासाचे चित्रण करण्यात आले आहे. वयाच्या ६९ व्या वर्षी, १९६५ मध्ये त्यांनी भगवद्गीतेतील कालातीत शिकवण आणि भगवान श्रीकृष्णांचा संदेश जगभर पोहोचवण्याच्या उद्देशाने भारतातून अमेरिकेकडे प्रस्थान केले. त्यांचे आध्यात्मिक गुरू श्रील भक्तिसिद्धांत सरस्वती ठाकूर यांनी दिलेल्या निर्देशांचे पालन करत त्यांनी या महान कार्याची सुरुवात केली. त्यांच्या अथक प्रयत्नांमुळे कृष्णभावनेचा संदेश जगभरातील लाखो लोकांपर्यंत पोहोचला. अढळ श्रद्धा, पूर्ण शरणागती, चिकाटी आणि निःस्वार्थ सेवेचे प्रतीक असलेले त्यांचे जीवन आजही अनेकांसाठी प्रेरणादायी आहे.
गौरा शक्ती दास यांनी या चित्रपटाचे लेखन आणि दिग्दर्शन केले आहे. राजेश सिंह आणि लोहित राव यांनी चित्रपटाची निर्मिती केली असून श्रीधर शिकारीपुरा यांनी व्हिज्युअल डायरेक्टर म्हणून काम पाहिले आहे. हा चित्रपट ट्रान्सेंडेंटल फिल्म्सची निर्मिती असून डाइव्ह डीप एआय स्टुडिओच्या सहकार्याने तयार करण्यात आला आहे. होम्बळे फिल्म्स या चित्रपटाचे सादरीकरण करणार असून जगभरात त्याचे वितरणही करणार आहे. श्री नरसिंह चैतन्य मठ, श्रीरंगपट्टण, इस्कॉन बंगळुरू, इस्कॉन आणि भक्तिवेदांत बुक ट्रस्ट यांच्या आशीर्वादाने या चित्रपटाची निर्मिती करण्यात येत आहे.
होम्बळे फिल्म्सने ‘केजीएफ’ फ्रँचायझी, ‘सालार’ आणि ‘कांतारा’ यांसारखे मोठे पॅन-इंडिया चित्रपट दिले आहेत. ‘महावतार नरसिंह’ या भारतातील सर्वात मोठ्या अॅनिमेशनपटाच्या यशानंतर ही निर्मिती संस्था भारतीय संस्कृती, श्रद्धा आणि सभ्यतेच्या ज्ञानपरंपरेतून प्रेरणा घेणाऱ्या कथांना सातत्याने प्रोत्साहन देत आहे. ‘शरणागती’च्या माध्यमातून सनातन परंपरेत रुजलेल्या कथा आधुनिक चित्रपटनिर्मिती तंत्रज्ञानाच्या साहाय्याने नव्या पिढीपर्यंत पोहोचवण्याचा प्रयत्न आहे. श्रील प्रभुपाद यांच्या व्यासपूजेच्या मुहूर्तावर, ऑगस्ट २०२७ मध्ये हा चित्रपट जगभरातील चित्रपटगृहांमध्ये प्रदर्शित होणार आहे.
स्रोत: मूळ बातमी
Leave a Reply