कुंडलिका नदी प्रदूषणाच्या विळख्यात; कारवाईची मागणी

रोहा तालुक्याची जीवनवाहिनी मानल्या जाणाऱ्या कुंडलिका नदीचे पाणी दिवसेंदिवस अधिक प्रदूषित होत चालले आहे. कचरा, प्रक्रिया न केलेले सांडपाणी आणि औद्योगिक रसायने यामुळे या जलस्रोतावर गंभीर संकट ओढवले आहे. ग्रामीण भागातील शेतकरी आणि नागरिकांसाठी वरदान ठरलेले हे पाणी दूषित होत असतानाही प्रशासनाकडून ठोस उपाययोजना होत नसल्याने परिसरात नाराजी पसरली आहे.

शहरातील काही चिकनविक्रेते कोंबड्यांची पिसे, पाय, मुंडकी आणि आतड्या रात्रीच्या वेळी नदीपात्रात टाकत असल्याचा आरोप होत आहे. त्यामुळे परिसरात दुर्गंधी पसरली असून नदीचे पाणी आणखी खराब होत आहे. शहरासह आसपासच्या गावांमधील सांडपाणी कोणतीही प्रक्रिया न करता थेट नदीत सोडले जाते. धाटाव औद्योगिक क्षेत्रातील काही कंपन्यांकडून रसायनयुक्त सांडपाणी नदीत सोडले जात असल्याची तक्रारही आहे. पुलावरून निर्माल्य आणि प्लॅस्टिकच्या पिशव्याही नदीत टाकल्या जात आहेत.

ग्रामीण भागाला पाण्याचा आधार

पाणीटंचाईच्या काळात कुंडलिका नदी ग्रामीण भागातील शेतकरी, नागरिक आणि जनावरांसाठी महत्त्वाचा आधार ठरते. मात्र दूषित पाण्यामुळे जनावरांच्या आरोग्यालाही धोका निर्माण होण्याची भीती शेतकरी व्यक्त करत आहेत. पिण्याच्या आणि शेतीच्या पाण्याचा हा प्रमुख स्रोत प्रदूषित राहिल्यास ग्रामीण जीवनावर त्याचा थेट परिणाम होणार आहे.

दोषींवर कठोर कारवाईची मागणी

नदीचे प्रदूषण रोखण्यासाठी संबंधित प्रशासनाने तातडीने उपाययोजना कराव्यात, अशी मागणी होत आहे. नदीपात्रात कचरा टाकणारे, सांडपाणी सोडणारे तसेच पर्यावरणाचे नुकसान करणाऱ्यांवर कठोर कारवाई करावी. नदीच्या दोन्ही टोकांवर कचरा टाकण्यास मनाई करणारे फलक लावून जनजागृती करावी, अशी मागणी भाजपचे रोहा तालुका सरचिटणीस शैलेश रावकर यांनी केली आहे.

स्रोत: मूळ बातमी