अन्न व औषध प्रशासनाचे आयुक्त तुकाराम मुंढे हे त्यांच्या धडक कारवायांमुळे चर्चेत असतात. दिवाळीपूर्वीही विभागाने अनेक ठिकाणी धाडी टाकून अनेक कारवाया केल्या, अटक केली आणि माल जप्त केला. भेसळयुक्त खाद्यपदार्थांविरोधातील त्यांच्या धडाकेबाज कारवायांचे कौतुक आणि चर्चा फक्त महाराष्ट्रातच नाही, तर देशभरात होत आहे. दरम्यान, मुंढे यांनी पहिल्या पोस्टिंगमधला एक किस्सा सांगितला आहे, जो सध्या चांगलाच व्हायरल झाला आहे.
२००७ मधील देगलूरचा किस्सा
तुम्हाला कधी कोणी पैसे, म्हणजे लाच देण्याचा प्रयत्न केला का, या प्रश्नावर बोलताना तुकाराम मुंढे यांनी सांगितले की, २००७ मध्ये पहिल्या पोस्टिंगमध्ये सहाय्यक जिल्हाधिकारी असताना असा प्रकार घडला होता. तेव्हा रेशन धान्याची तस्करी करणारा ट्रक रात्रभर पाळत ठेवून पकडलेला. त्यांना देगलूरला पोस्टिंगवर असताना टीप मिळाली होती. त्यानंतर ते, त्यांचा चालक आणि तलाठी त्या ठिकाणी जाऊन रात्रभर पाळत ठेवून रेशनच्या तस्करीचा ट्रक पकडला. त्यामध्ये गहू आणि तांदूळ होते. त्यांनी तो ट्रक कार्यालयात आणून लावला.
दुसऱ्या दिवशी आलेला फोन
दुसऱ्या दिवशी मुंढे यांना फोन आला. कार्यालयात बसल्यानंतर हा फोन ऐकून ते थक्क झाले. फोन करणारी व्यक्ती ‘साहेब, मी तुमच्याच जातीचा आहे’, असे बोलत होती. मुंढे यांनी त्या व्यक्तीला सांगितले की, मी तुम्हाला ओळखत नाही. नंतर तो म्हणाला की, तुम्ही गाडी पकडली ती माझी आहे, माझी मदत करा. खरंतर मला जात ही गोष्टच पटत नाही, असे मुंढे यांनी सांगितले. त्यानंतर त्यांनी त्या व्यक्तीला म्हटले की, तुम्ही फोन केला, पण समोर या, मग काय मदत करायची ती करतो. असे मोठ्या आवाजात बोलताच त्या व्यक्तीने फोन कट केला. त्यानंतर त्या व्यक्तीवर गुन्हा दाखल केला आणि कायदेशीर कारवाई केली. मुंढे यांनी नमूद केले की, ही एकमेव घटना आहे. त्यांनी असेही सांगितले की, आतापर्यंत कोणीही त्यांना पैसे देण्याची ऑफर केलेली नाही, पण अप्रोच करण्याचा प्रयत्न मात्र झाला होता आणि तेव्हा त्यांनाही धक्का बसला होता.
स्रोत: मूळ बातमी
Leave a Reply