मुंबई: दिवाळी साजरी करण्याच्या पद्धतीवरून राजकीय वाद पेटला आहे. उद्धव ठाकरे गटाचे खासदार संजय राऊत यांनी आजच्या पत्रकार परिषदेत पंतप्रधान नरेंद्र मोदी आणि मुख्यमंत्री देवेंद्र फडणवीस यांच्यावर जोरदार टीका केली. सैनिकांसोबत आणि शेतकऱ्यांसोबत दिवाळी साजरी करण्याच्या त्यांच्या योजनेवर राऊतांनी खोचक शब्दांत निशाणा साधला. हा केवळ एक कार्यक्रम होऊ नये, असेही त्यांनी सुचवले.
शेतकऱ्यांच्या घरी दिवाळी
मुख्यमंत्री आणि राज्यातील इतर मंत्री शेतकऱ्यांच्या घरी जाऊन दिवाळी साजरी करण्याचा संकल्प त्यांनी सोडला आहे. मुख्यमंत्री देवेंद्र फडणवीस नागपूर जिल्ह्यातील एका शेतकऱ्याच्या घरी जाऊन थांबणार आहेत. महसूलमंत्री चंद्रकांत बावनकुळे यांच्यासह इतर मंत्र्यांनीही हाच कित्ता गिरवला आहे. राऊत म्हणाले की, ही संकल्पना चांगली आहे. राज्यात दुष्काळ आहे आणि शेतकरी अस्वस्थ आहेत. त्यामुळे शेतकऱ्यांच्या घरी जाऊन दिवाळी साजरी करण्याचा विचार चांगला आहे, पण त्यांनी तिथे जाऊन पाहिले पाहिजे की, त्यांनी दिलेली पाच हजार रुपयांची मदत पुरेशी आहे का. शेतकऱ्यांच्या घरी आणि बांधावर गेल्यावरच हे कळेल, असे राऊत म्हणाले.
मुख्यमंत्र्यांनी शेतकऱ्यांच्या घरी जाऊन दिवाळी साजरी केली, यावर टीका करण्यात काही अर्थ नाही, असेही राऊतांनी स्पष्ट केले. सरकार शेतकऱ्यांसोबत आहे, हे दाखवण्याचा त्यांचा प्रयत्न आहे. पण शेतकऱ्यांच्या घरी एक दिवस दिवाळी साजरी करून त्यांचे दुःख कमी होणार नाही आणि त्यांचे प्रश्न संपणार नाहीत. सरकारला अत्यंत ठोस निर्णय घ्यावे लागतील. सरकारला वारंवार शेतकऱ्यांच्या घरापर्यंत आणि बांधापर्यंत पोहोचावे लागेल, असा टोला राऊतांनी लगावला.
सैनिकांसोबत दिवाळीवर प्रश्न
गेल्या काही वर्षांपासून पंतप्रधान सैनिकांसोबत दिवाळी साजरी करतात. पण सैनिकांसोबत दिवाळी साजरी केली म्हणून चीनची घुसखोरी थांबत नाही, किंवा पुलवामा आणि पहलगामसारख्या घटना थांबत नाहीत, असा झोंबणारा सवाल राऊतांनी केला. हा तुमचा एक दिवसाचा कार्यक्रम आहे. पुढे काय, असेही त्यांनी विचारले. मुख्यमंत्र्यांनी शेतकऱ्यांच्या घरी जाऊन दिवाळी साजरी केली, यात नवीन काय आहे? यापूर्वीच्या मुख्यमंत्र्यांनीही असे उपक्रम राबवले आहेत. त्यात खास कौतुक करण्यासारखे काय आहे, असा सवाल राऊतांनी केला.
मुख्यमंत्र्यांचे आणि राज्यकर्त्यांचे ते कर्तव्यच आहे, असे राऊत म्हणाले. शेतकऱ्यांची अवस्था तुम्ही जाऊन पाहायला हवी. मुख्यमंत्री शेतकऱ्याच्या घरी जाऊन मांडी घालून फराळ करत आहेत. पण हा फराळ खरोखर त्या शेतकऱ्याच्या घरी झाला आहे की जिल्हाधिकाऱ्यांनी दिला आहे, असा खोचक सवालही राऊतांनी विचारला.
स्रोत: मूळ बातमी
Leave a Reply