सोने-चांदीचा दर घसरल्याने आणि सणामुळे जळगाव येथील सुवर्णबाजारात ग्राहकांची सोन्याचे दागिने आणि चांदीच्या वस्तू घेण्यासाठी गर्दी होत आहे. धनत्रयोदशीला सुवर्णबाजारात सुमारे सोळा ते सतरा कोटी रुपयांची उलाढाल झाली. सप्टेंबर २०२६ च्या भावांच्या तुलनेत आताच्या भावात सोन्यात सुमारे आठ हजार तर चांदीत ४३ हजारांची घट झाली आहे. यामुळेच बाजारपेठेत सध्या गर्दी होत असल्याचे चित्र आहे. धनत्रयोदशीला सोने-चांदी व्यवसायाला आलेली झळाळी रविवारी लक्ष्मीपूजनाच्या दिवशीही कायम राहील, असा अंदाज सुवर्ण व्यावसायिकांना आहे.
गतवर्षीच्या तुलनेत भाव किती वाढले?
धनत्रयोदशीला गतवर्षी सोन्याचा भाव १ लाख २८ हजार ५०० रुपये प्रतिदहा ग्रॅम होता. यंदा तो १ लाख ४६ हजार ८७८ रुपये होता. म्हणजे गतवर्षीपेक्षा १८ हजार ३७८ रुपयांनी सोने यंदा महाग आहे. तीच स्थिती चांदीची आहे. गतवर्षी चांदी १ लाख ७० हजार रुपये प्रती किलो होती. यंदा ती २ लाख ९२ हजार ६१० रुपये आहे. यात २२ हजार ६१० रुपयांचा फरक आहे, तेवढी चांदी यंदा महाग आहे.
मात्र दोन महिन्यांपूर्वी सप्टेंबरला १ लाख ५० हजारांवर असलेले सोने आज १ लाख ४२ हजारांवर आहे, म्हणजे सुमारे सात हजार ५०० रुपयांनी कमी आहे. तर चांदीचा भाव सप्टेंबरमध्ये २ लाख ३१ हजार रुपये होता. तो आज १ लाख ८८ हजार रुपये आहे, म्हणजे ४३ हजारांनी कमी आहे. यामुळे गुंतवणूकदारांनी सोने-चांदी खरेदीसाठी गर्दी केली आहे.
सोने खरेदीमागील कारणे
दर कमी असल्याने कमी भावात खरेदी करता येणे, लग्नासाठी तसेच गुंतवणुकीसाठी खरेदी, आर्थिक अनिश्चिततेमुळे सुरक्षित पर्याय म्हणून सोन्याकडे पाहणे आणि सोन्याचे भाव पुन्हा वाढतील अशी आशा ही खरेदीमागील प्रमुख कारणे आहेत. केंद्रीय बँकांकडून सोन्याची खरेदी होत असणे, डॉलर कमकुवत होणे आणि व्याजदर कमी होण्याची अपेक्षा यामुळेही सोन्यातील गुंतवणुकीला प्रोत्साहन मिळू शकते. बँक ठेवींपेक्षा सोन्यात गुंतवणूक केल्यास चांगला परतावा मिळेल, अशी धारणा अनेक ग्राहकांमध्ये आहे.
स्रोत: मूळ बातमी
Leave a Reply