दिवाळीचा आनंददायी सण सुरू झाला असून, नाशिकच्या बाजारपेठा गृहपयोगी वस्तूंनी सजल्या आहेत. यंदा शहरातील ग्राहक फ्रीज, वॉशिंग मशिन, टीव्ही, एसी, मायक्रो ओव्हन आणि एअर फ्रायर यांसारख्या वस्तू खरेदीकडे वळले आहेत. खरेदीचा उत्साह पाहून शोरूम्सनीही मोठी तयारी केली आहे.
अनेक कंपन्या आणि आस्थापनांनी कर्मचाऱ्यांना बोनस दिल्यामुळे बाजारपेठेत खरेदीसाठी गर्दी वाढली आहे. सणाच्या मुहूर्तावर घरगुती उपकरणे खरेदी करण्याकडे नागरिकांचा कल दिसतो आहे. यात फ्रीजची मागणी सर्वांत जास्त आहे. बाजारात १८५ लीटर क्षमतेपासून पुढील आणि वेगवेगळ्या रंगांचे विविध कंपन्यांचे फ्रीज उपलब्ध आहेत.
अँड्रॉइड टीव्ही खरेदीकडेही नाशिककरांचा ओढा वाढला आहे. बहुतेक ग्राहक ३२, ४०, ४२, ५५ ते ६५ इंचाचे टीव्ही घेत आहेत, तर ६५ इंचापेक्षा मोठ्या टीव्हींनाही चांगला प्रतिसाद मिळत असल्याचे शोरूम संचालक सांगतात.
नोव्हेंबर महिना सुरू झाला असला तरी थंडी अजून जाणवत नाही. वातावरणातील सततच्या बदलांमुळे उकाडा वाढला आहे. त्यामुळे एक टन क्षमतेपासून पुढील एसींची खरेदी वाढली आहे. वॉशिंग मशिन, एअर फ्रायर आणि वेगवेगळ्या प्रकारच्या ज्युसर्सचीही खरेदी जोरात सुरू आहे. घर सजवण्यासाठी आणि रोजच्या वापरासाठी लागणाऱ्या उपकरणांची मागणी वाढल्याने बाजारपेठेत उत्साहाचे वातावरण आहे.
मोबाईल बाजारपेठेत धूम
मोबाईल खरेदीला नाशिककरांची सर्वाधिक पसंती मिळत आहे. दिवाळीत नवीन मोबाईल घेण्यासाठी ग्राहकांची लगबग दिसते आहे. बाजारात दहा हजार रुपयांपासून ते दोन ते अडीच लाख रुपयांपर्यंतचे मोबाईल उपलब्ध आहेत. कंपन्यांनी सणाच्या निमित्ताने विविध ऑफर्स जाहीर केल्या आहेत. या क्षेत्रातील तज्ज्ञांच्या अंदाजानुसार, यंदाच्या दिवाळीत मोबाईल बाजारपेठेत अंदाजे २५ ते ३० कोटी रुपयांची उलाढाल होऊ शकते.
ऑफर्सचा वर्षाव
खरेदीचा ओघ पाहून शोरूम्सकडून ग्राहकांना आकर्षित करण्यासाठी विविध ऑफर्स दिल्या जात आहेत. ठराविक खरेदीवर भेटवस्तू आणि दरात सवलत मिळत आहे. त्याचबरोबर बँका आणि फायनान्स कंपन्या क्रेडिट कार्डवर सवलतीसह शून्य टक्के व्याजदराने कर्ज देत आहेत, त्यामुळे ग्राहकही समाधानी आहेत.
स्रोत: मूळ बातमी
Leave a Reply