धुळे जिल्ह्यातील कृषी उत्पन्न बाजार समित्यांमध्ये वाढता बाजारखर्च, मनमानी कपाती आणि अपुऱ्या सुविधांमुळे त्रस्त शेतकऱ्यांना आपला शेतमाल जळगाव आणि नाशिकसारख्या इतर जिल्ह्यांत नेऊन विकावा लागत आहे. या प्रकरणी चौकशी करून योग्य ती कारवाई करावी, अन्यथा तीव्र आंदोलन करण्यात येईल, असा इशारा शिवसेना उद्धव बाळासाहेब ठाकरे पक्षातर्फे निवेदनाद्वारे देण्यात आला आहे.
पणनमंत्री तथा जिल्ह्याचे पालकमंत्री जयकुमार रावल यांची भेट घेऊन पक्षातर्फे सविस्तर निवेदन सादर करण्यात आले. स्थानिक बाजार समित्यांमधील वाढता खर्च, मोजमापातील तफावत आणि व्यापाऱ्यांच्या मनमानी कारभारावर नियंत्रण मिळवण्यासाठी पणनमंत्र्यांनी तातडीने लक्ष घालून जिल्हाधिकाऱ्यांच्या अध्यक्षतेत संयुक्त चौकशी समिती स्थापन करावी, अशी मागणी निवेदनात करण्यात आली आहे.
शेतकऱ्यांसमोर अनेक संकटे
जिल्ह्यातील शेतकरी दुष्काळसदृश स्थिती, वाढता उत्पादन खर्च, महागडी खते आणि बियाणे, औषधे, मजुरी, वीज, सिंचन आणि वाहतूक खर्च अशा अनेक संकटांना सामोरे जात आहेत. जिल्ह्यात कापूस, मका, गहू, ज्वारी, बाजरी, कडधान्ये, कांदा आणि लाल मिरची आदी पिकांचे मोठ्या प्रमाणावर उत्पादन होते. तरीही विक्रीसाठी स्थानिक बाजार समित्यांऐवजी शेतकरी इतर जिल्ह्यांकडे वळत असल्यास त्यामागील कारणांची शासनाने वस्तुनिष्ठ चौकशी करणे आवश्यक असल्याचे जिल्हाप्रमुख अतुल सोनवणे, नरेंद्र परदेशी, निंबा मराठे, धीरज पाटील, प्रशांत भदाणे, बाबाजी पाटील, हेमराज पाटील आणि सुनील पाटील यांनी म्हटले आहे.
स्रोत: मूळ बातमी
Leave a Reply