उल्हासनगर शहरातील सुभाष टेकडी परिसरात गेल्या काही दिवसांपासून दुर्गंधीयुक्त पाणी येत असल्याने नागरिक त्रस्त झाले आहेत. या भागात बाटलीबंद पाण्याला मागणी मोठ्या प्रमाणात वाढली असून पाण्याच्या बाटल्याही मिळेनाशा झाल्या आहेत. पिण्याच्या पाण्याचा प्रश्न ऐरणीवर आल्याने परिसरातील रहिवाशांमध्ये चिंतेचे वातावरण आहे.
गढूळ पाण्यामुळे नागरिकांना त्रास
सुभाष टेकडी भागात दिवसाआड पाणी येते, मात्र त्याची वेळ निश्चित नाही. चार ते पाच दिवसांपूर्वी नळाला अत्यंत गढूळ आणि दुर्गंधीयुक्त पाणी आले होते. त्यामुळे नागरिकांमध्ये भीतीचे वातावरण निर्माण झाले होते. उग्र वासामुळे हे पाणी पिण्यायोग्य नव्हते. मात्र ज्या नागरिकांनी या पाण्याचा वापर केला, त्यांना खोकला, उलट्या आणि जुलाबाचा त्रास झाला होता. दिवसाआड किंवा एखाद दिवस उशिराने नळाला पाणी येत असल्याने ते साठवून ठेवण्याशिवाय नागरिकांकडे पर्याय राहत नाही. मात्र त्या दिवशी नळाद्वारे आलेले गढूळ रंगाचे आणि प्रचंड दुर्गंधी असलेले पाणी नागरिकांनी फेकून दिले होते.
आता नळाला स्वच्छ पाणी येत असले तरी त्यात क्लोरीनचे प्रमाण अधिक असल्याने हे पाणी पिण्याची इच्छा होत नाही. त्यामुळे आरोग्य बिघडण्याऐवजी नागरिकांचा कल बाटलीबंद पाणी आणि पाण्याच्या बाटल्यांकडे वाढला आहे. मात्र सुभाष टेकडीमध्ये झोपडपट्टी आणि गोरगरीब नागरिकांची संख्या मोठ्या प्रमाणात असल्याने त्यांनी किती दिवस विकत पाणी प्यावे, असा सवाल सामाजिक कार्यकर्ते संजय वाघमारे यांनी उपस्थित केला आहे.
एमआयडीसीकडे पत्रव्यवहार
यासंदर्भात पाणीपुरवठा विभागाचे कार्यकारी अभियंता अशोक घुले आणि उपअभियंता दीपक ढोले यांच्याशी संपर्क साधला असता, एमआयडीसीकडून पालेगाव जलवाहिनीतून पाणीपुरवठा केला जात असल्याचे सांगण्यात आले. उग्र वासाचे पाणी येत असल्याबाबत एमआयडीसीला पत्रव्यवहार करण्यात आल्याचेही त्यांनी सांगितले.
स्रोत: मूळ बातमी
Leave a Reply