नोव्हेंबर महिन्यात निवृत्तीवेतनधारकांना हयातीचा दाखला सादर करावा लागतो. त्यानंतर त्यांचे पुढील वर्षभर निवृत्तीवेतन सुरू राहते. यंदा ही मुदत ३० नोव्हेंबरपर्यंत आहे. मात्र आता हयातीचे दाखले सादर करण्यासाठी प्रत्यक्ष उपस्थितीसोबतच ऑनलाइन सुविधाही उपलब्ध करून देण्यात आली आहे.
निवृत्तीवेतन घेणाऱ्या राज्य शासकीय सेवानिवृत्त अधिकारी, कर्मचारी तसेच कुटुंब निवृत्तीवेतनधारकांनी सन २०२६-२७ या वर्षासाठीचे हयातीचे दाखले १ नोव्हेंबर ते ३० नोव्हेंबर २०२६ या कालावधीत सादर करावेत, असे आवाहन वरिष्ठ कोषागार अधिकारी वैजनाथ शेळके आणि सहायक संचालक सुषमा बुरकुले यांनी केले आहे.
बँक शाखेत दाखल्यावर स्वाक्षरी
जिल्हा कोषागार कार्यालयामार्फत निवृत्तीवेतनधारकांचे नाव, निवृत्तीवेतन क्रमांक व बँक खाते क्रमांक नमूद असलेले मुद्रित हयातीचे दाखले संबंधित बँक शाखांमध्ये उपलब्ध करून देण्यात आले आहेत. त्यामुळे निवृत्तीवेतनधारकांनी ३० नोव्हेंबरपर्यंत स्वतः संबंधित बँक शाखेत उपस्थित राहून आपल्या नावासमोरील मुद्रित दाखल्यावर स्वाक्षरी करावी.
निवृत्तीवेतन सुरळीतपणे सुरू राहण्यासाठी हयातीचा दाखला विहित मुदतीत सादर करणे आवश्यक आहे. त्यामुळे सर्व निवृत्तीवेतनधारक व कुटुंब निवृत्तीवेतनधारकांनी उपलब्ध सुविधांचा लाभ घेऊन ३० नोव्हेंबरपूर्वी हयातीचे दाखले सादर करावेत आणि प्रशासनास सहकार्य करावे, असे आवाहन करण्यात आले आहे.
दाखला सादर करण्याचे पर्याय
निवृत्तीवेतन, कुटुंब निवृत्तीवेतनधारकांची दरवर्षी नोव्हेंबर महिन्यात हयातीबाबत नियतकालिक ओळख पडताळणी करण्यात येते. या प्रक्रियेसाठी निवृत्तीवेतनधारकांना विविध पर्याय उपलब्ध करून देण्यात आले आहेत. बँक शाखेत प्रत्यक्ष उपस्थित राहून बँक अधिकाऱ्यांच्या समक्ष हयातीच्या दाखल्यावर स्वाक्षरी करून तो सादर करता येईल. डिजिटल जीवन प्रमाण पोर्टलवर जाऊन ऑनलाइन पद्धतीने हयातीचा डिजिटल दाखला सादर करता येईल. विहित नमुन्यातील हयातीच्या दाखल्यावर बँक अधिकारी किंवा राजपत्रित अधिकाऱ्यांच्या समक्ष स्वाक्षरी करून तो जिल्हा कोषागार कार्यालयात सादर करता येईल. इंडिया पोस्ट पेमेंट बँकेमार्फत डिजिटल हयातीचा दाखला ऑनलाइन सादर करण्याची सुविधाही उपलब्ध आहे. अँड्रॉइड किंवा आयओएस मोबाइलमध्ये जीवन प्रमाण ॲप डाउनलोड करून डिजिटल पद्धतीने हयातीचा दाखला सादर करता येईल.
स्रोत: मूळ बातमी
Leave a Reply