नाशिक जिल्ह्यात चारा टंचाई निवारणासाठी पशुसंवर्धन विभागाने शेतकऱ्यांना मोफत चारा बियाणे वाटण्यास सुरुवात केली आहे. दीपावलीच्या मुहूर्तावर वाटपास प्रारंभ झाला असून एकूण ३ कोटी रुपयांचे एक लाख १७ हजार किलो चारा बियाणे मोफत दिले जात आहे. किमान तीन ते चार वेळा पाणी देण्याची क्षमता असलेल्या शेतकऱ्यांना प्रत्येकी चार हजार रुपयांचे बियाणे पूर्णत: मोफत देण्यात येत आहे.
चारा टंचाईची पार्श्वभूमी
जिल्ह्यात विविध प्रकारची १८ लाख जनावरे आहेत. त्यांना महिन्याकाठी एक लाख ९४ हजार टन ओला व सुका चारा लागतो. खरीप हंगामातील चारा जानेवारी २०२७ पर्यंत पुरेल इतकाच असल्याने फेब्रुवारीपासून चारा टंचाई निर्माण होईल. त्यादृष्टीने कृषी विभागाने जिल्हा परिषदेचे मुख्य कार्यकारी अधिकारी ओमकार पवार यांच्यामार्फत जिल्हाधिकारी आयुष प्रसाद यांच्याकडे चारा बियाण्याची मागणी केली होती. पालकमंत्री गिरीश महाजन यांनी हा प्रस्ताव मंजूर केल्यामुळे जिल्ह्यात बियाणे वाटपास मंगळवारी, ३ नोव्हेंबरपासून सुरुवात झाली.
ज्वारीचे क्षेत्र वाढविण्याचे नियोजन
जिल्ह्यात रब्बीचे एकूण १.११ लाख हेक्टर क्षेत्र आहे. त्यात १० हजार हेक्टरवर ज्वारीची पेरणी होते. पण यंदा हे क्षेत्र ३० हजार हेक्टरपर्यंत वाढवून चारा टंचाईवर मात करण्याचे नियोजन सुरू आहे. पाणी उपलब्ध असलेल्या निफाड, दिंडोरी, कळवण, मालेगाव, देवळा आणि सिन्नर या तालुक्यांमधील शेतकऱ्यांना वाटप चालू आहे. याद्वारे साधारणत: एक महिना पुरेल इतका ओला चारा उपलब्ध होणार आहे.
सहायक पशुसंवर्धन अधिकारी डॉ. संजय शिंदे यांनी सांगितले की, जानेवारीनंतरही चारा बियाण्याची गरज भासल्यास सीएसआरच्या माध्यमातून बियाणे उपलब्ध करून दिले जाईल. चारा टंचाई भासणार नाही, यादृष्टीने नियोजन चालू आहे.
स्रोत: मूळ बातमी
Leave a Reply