नवी मुंबई: फटाके फक्त संध्याकाळी ७ ते रात्री १० वाजेपर्यंत

दिवाळीच्या पार्श्वभूमीवर नवी मुंबईत ध्वनी आणि वायुप्रदूषणाला आळा घालण्यासाठी महापालिकेने कडक पावले उचलली आहेत. न्यायालयाच्या आदेशानुसार नागरिकांना फटाके फक्त संध्याकाळी ७ ते रात्री १० या वेळेतच वाजवण्याची परवानगी देण्यात आली आहे. नियमांचे उल्लंघन करणाऱ्यांवर कठोर कारवाई केली जाणार आहे. तक्रारी नोंदविण्यासाठी पालिकेने प्रभागनिहाय हेल्पलाईन क्रमांक आणि ई-मेल आयडी जाहीर केले आहेत. ध्वनी व वायुप्रदूषण रोखण्यासाठी महापालिकेची यंत्रणा सज्ज ठेवण्यात आली आहे.

दिवाळीत हवेची गुणवत्ता खालावते

दिवाळीच्या काळात फटाक्यांमुळे हवेतील प्रदूषणात मोठी वाढ होत असल्याचे निदर्शनास आले आहे. सामान्य दिवसांत सरासरी ९१ असणारा हवा गुणवत्ता निर्देशांक दिवाळीदरम्यान वाढून सरासरी २१२ पर्यंत पोहोचत असल्याचे महापालिकेने स्पष्ट केले आहे. यामुळे नागरिकांना श्वसनविकारांसह विविध आरोग्यविषयक समस्यांना सामोरे जावे लागते. त्यामुळे पर्यावरणपूरक दिवाळी साजरी करण्याचे आवाहन करण्यात आले आहे. शैक्षणिक संस्थांनी विद्यार्थ्यांमध्ये प्रदूषणाच्या दुष्परिणामांबाबत जनजागृती करावी, असेही सांगण्यात आले आहे. पोलिस प्रशासन आणि महापालिकेच्या विभागीय सहाय्यक आयुक्तांनी नियमांची प्रभावी अंमलबजावणी करण्यासाठी दक्षता घ्यावी, असे निर्देश आहेत.

बेलापूर, नेरूळ, वाशी, तुर्भे, कोपरखैरणे, घणसोली, ऐरोली आणि दिघा या आठ विभागांसाठी स्वतंत्र भ्रमणध्वनी क्रमांक आणि ई-मेल आयडी जाहीर करण्यात आले आहेत. त्यामुळे प्रत्येक भागातील नागरिक आपल्या विभागातील तक्रार थेट संबंधित यंत्रणेकडे नोंदवू शकणार आहेत.

घातक फटाक्यांवर बंदी

अधिसूचनेनुसार १२५ डेसिबलपेक्षा जास्त आवाज निर्माण करणाऱ्या फटाक्यांच्या उत्पादन, विक्री आणि वापरावर पूर्ण बंदी आहे. बेरियम सॉल्ट, लिथियम, अर्सेनिक, शिसे आणि पारा यांसारखी घातक रसायने असलेल्या फटाक्यांवरही कठोर बंदी घालण्यात आली आहे. फटाकेविक्रेत्यांनी महापालिकेने निश्चित केलेल्या अधिकृत ठिकाणीच सर्व परवानग्या घेऊन विक्री करावी, असे निर्देश देण्यात आले आहेत. फटाके वाजविण्यासाठी रात्री १० वाजेपर्यंतची मर्यादा निश्चित करण्यात आली आहे.

स्रोत: मूळ बातमी