अग्निवीर योजनेत केंद्र सरकारने मोठा बदल जाहीर केला आहे. पहिली चार वर्षांची सेवा पूर्ण करणाऱ्या २५ टक्के अग्निवीरांना गुणवत्तेनुसार नियमित सेवेत संधी मिळणार आहे. उर्वरित ७५ टक्के अग्निवीरांना आणखी दोन वर्षे सेवा करण्याची संधी दिली जाणार असून त्यानंतरही नियमित सैन्यात भरती होण्याचा मार्ग खुला राहणार आहे. केंद्रीय मंत्रिमंडळाने या निर्णयाला मंजूरी दिली आहे.
वाढीव काळात अधिक वेतन, सोयी-सुविधा आणि मूल्यमापन
ज्या अग्निवीर सैनिकांच्या सेवेचा काळ संपत आला आहे, त्यांच्या सेवेला दोन वर्षांची मुदतवाढ देण्यात येणार आहे. या दोन वर्षांच्या वाढीव कालावधीत अग्निवीरांना आकर्षक पगार आणि अतिरिक्त सोयी-सुविधा प्राधान्याने दिल्या जाणार आहेत. वाढीव दोन वर्षांचा कार्यकाळ यशस्वीरीत्या पूर्ण करणाऱ्या अग्निवीरांच्या कामगिरीचे मूल्यमापन केले जाणार असून त्यानुसार पात्र जवानांना भारतीय सैन्यात कायमस्वरूपी रुजू केले जाणार आहे.
सेवा-स्थैर्य आणि आर्थिक लाभ
चार वर्षांच्या सेवेनंतर पुढे काय, असा प्रश्न जवानांसमोर उपस्थित केला जात असे. आता त्यांना थेट दोन वर्षांसाठी सेवा-स्थैर्य मिळाले आहे. वाढीव दोन वर्षांमध्ये अधिकचे वेतन आणि भत्तेही लागू केले जातील. कामगिरीच्या जोरावर लष्कराचे नियमित सैनिक होण्याचा मार्ग आता मोकळा झाला आहे. लष्कराची कार्यक्षमता वाढवणे आणि तरुणांना सैन्यदलात दीर्घकाळ सेवा बजावण्याची संधी देणे, हा यामागचा उद्देश असल्याचे सरकारने स्पष्ट केले आहे.
स्रोत: मूळ बातमी
Leave a Reply