ग्रामीण भागातील आरोग्य व्यवस्था बळकट करण्यासाठी अत्यंत कमी मानधनावर काम करणाऱ्या आशा सेविकांच्या प्रलंबित मागण्यांकडे शासनाचे लक्ष वेधण्यासाठी आगामी हिवाळी अधिवेशनाच्या काळात नागपूर येथे मोर्चा काढण्यात येणार आहे. आयटक या संघटनेच्या माध्यमातून हा मोर्चा निघेल, अशी माहिती संघटनेच्या जिल्हाध्यक्ष सुरेखा खैरनार यांनी दिली.
आशा सेविका गेल्या अनेक वर्षांपासून अत्यल्प मोबदल्यावर काम करत आहेत. केंद्र सरकारने २०१८ पासून आशा गटप्रवर्तकांच्या मोबदल्यात कोणतीही वाढ केलेली नाही. उलट २०२६-२७ या वर्षाच्या वार्षिक कृती आराखड्यात त्यांच्या मोबदल्यात कपात करण्यात आल्याने आशा गटप्रवर्तकांमध्ये नाराजी पसरली आहे.
आशा सेविकांच्या प्रमुख मागण्या
आशा गटप्रवर्तकांना सन्मानाची वागणूक मिळावी, ही प्रमुख मागणी आहे. तसेच दिवाळीपूर्वी प्रलंबित मोबदला त्यांच्या खात्यात जमा करावा, अशीही मागणी करण्यात आली आहे. गटप्रवर्तकांचे कंत्राटी कर्मचाऱ्यांप्रमाणे समायोजन करावे आणि त्यांना भविष्य निर्वाह निधी तसेच राज्य विमा योजना लागू करावी, अशा मागण्या संघटनेने मांडल्या आहेत.
राज्यव्यापी आंदोलनाचे आवाहन
राज्यव्यापी आंदोलनात सहभागी होण्याचे आवाहन राजू देसले आणि सुरेखा खैरनार यांनी केले आहे. गेल्या अनेक वर्षांपासून आशा गटप्रवर्तकांच्या समस्या प्रलंबित असून, वारंवार शासनदरबारी प्रश्न मांडूनही त्याची दखल घेतली जात नसल्याने आंदोलनाची वेळ आली आहे, असे संघटनेने म्हटले आहे. आशा सेविकांच्या प्रलंबित प्रश्नांवर आगामी काळात अधिक तीव्रतेने लढा देण्याचा निर्धार संघटनेने व्यक्त केला आहे.
स्रोत: मूळ बातमी
Leave a Reply