सिंहस्थ कुंभमेळ्याचा ध्वजारोहण सोहळा पार पडल्यानंतर रविवारी त्र्यंबक नगरी पुन्हा एकदा गजबजून गेली. त्र्यंबकेश्वर मंदिरात दर्शनासाठी आणि तीर्थराज कुशावर्तावर स्नानासाठी दहा हजारांहून अधिक भाविकांनी गर्दी केली. दोन दिवस ठप्प असलेली बाजारपेठही पूर्वपदावर आल्याने स्थानिक व्यावसायिकांनी सुटकेचा निश्वास सोडला.
दोन दिवस मंदिर बंद होते
ध्वजारोहणामुळे शुक्रवार आणि शनिवार (३१ ऑक्टोबर) असे दोन दिवस त्र्यंबकेश्वर मंदिर सर्वसामान्यांसाठी बंद ठेवण्यात आले होते. राष्ट्रपती, मुख्यमंत्री, उपमुख्यमंत्री आणि राज्यातील अर्धा डझन मंत्र्यांच्या उपस्थितीत नाशिक व त्र्यंबकेश्वर येथे एकाच वेळी ध्वजारोहण झाले. या काळात पोलिसांनी कडेकोट बंदोबस्त ठेवला होता. प्रवेशद्वारापासून कुशावर्त तीर्थापर्यंत रस्त्याच्या दोन्ही बाजूंना पांढरे पडदे लावून त्यावर कुंभमेळ्याचे फलक लावण्यात आले होते, जेणेकरून रस्त्यालगत सुरू असलेली कामे नजरेस पडणार नाहीत. नागरिकांना घराबाहेर पडण्यास मनाई होती. त्यामुळे ३० व ३१ ऑक्टोबरला मंदिरात दर्शन घेता आले नाही आणि कुशावर्तावर स्नानही बंद होते. नगरपालिका प्रशासनाने स्थानिकांना याबाबत सूचना देऊन सुरक्षा व स्वच्छता राखली.
बाजारपेठा पुन्हा खुल्या, खरेदीचा उत्साह
दोन दिवसांचा सोहळा संपताच त्र्यंबकवासीय घराबाहेर पडले आणि थेट मंदिर व कुशावर्त तीर्थ गाठले. भाविकांनी स्नान करून त्र्यंबकराजाचे दर्शन घेतले. फुल विक्रेते आणि हॉटेल चालकांसह व्यावसायिकांनी सकाळपासूनच आपली दुकाने उघडली. दिवाळी सणामुळे बाजारात खरेदीचा उत्साह आधीच होता, त्यामुळे रविवारी नागरिकांनी खरेदीचा मनमुराद आनंद लुटला.
कुशावर्तावर मर्यादित भाविकांनाच स्नान करणे शक्य असल्याने त्याला पर्याय म्हणून पेगलवाडी येथील प्रयागराज तीर्थाशेजारी गोदावरी नदीवर नव्या घाटांची निर्मिती करण्यात आली आहे. या घाटांवरही मुख्यमंत्र्यांच्या हस्ते ध्वजारोहण झाल्याने धार्मिकदृष्ट्या त्यांना (नवीन कुशावर्त) महत्त्व प्राप्त झाले आहे. भाविकांनी आता तिथे जाण्यास सुरुवात केली असली, तरी तेथील कामकाज अद्याप पूर्ण झालेले नाही.
स्रोत: मूळ बातमी
Leave a Reply