नगरसूलमध्ये तिसरी धम्म परिषद उत्साहात संपन्न

नगरसूल येथील डॉ. बाबासाहेब आंबेडकर स्मारक परिसरात रविवारी तिसरी धम्म परिषद उत्साहपूर्ण आणि चैतन्यमय वातावरणात पार पडली. धम्मक्रांती बुद्ध विहार, नगरसूल येथे भदंत भारद्वाज यांनी वर्षावासातील तीन महिन्यांचे अधिष्ठान पूर्ण केल्याच्या निमित्ताने पवारणा कार्यक्रमाचे औचित्य साधून ही परिषद आयोजित करण्यात आली होती. यावेळी भिक्खू गुणरत्न महास्थवीर, शिलरत्न स्थविर, अमृतानंदबोधी स्थविर, आनंदभुमन सिरी स्थविर, सच्चितबोधी, भद्रराज, आनंदमित्त आणि धम्मपाल यांच्यासह अनेक मान्यवर उपस्थित होते.

शांती आणि समतेचा संदेश

जगाला युद्ध नको, तर बुद्ध हवा, हा विचार समाजापर्यंत पोहोचवणे हा या परिषदेचा उद्देश होता. समता, शांती आणि करुणेची आज गरज असल्याचे यावेळी सांगण्यात आले. गौतम बुद्धांचा लोकहिताचा धम्म जगापर्यंत पोहोचावा, यासाठी ही परिषद झाली. महाराष्ट्राच्या विविध भागांतून पूज्य भिक्खू संघासह बौद्ध उपासक आणि उपासिका मोठ्या संख्येने या कार्यक्रमाला उपस्थित होत्या.

ध्वजारोहण आणि रॅलीने सुरुवात

सकाळी ध्वजारोहणाने कार्यक्रमाची सुरुवात झाली. त्यानंतर पूज्य भिक्खू संघाच्या उपस्थितीत सद्‌धम्म मानवता रॅली काढण्यात आली. या रॅलीदरम्यान डॉ. बाबासाहेब आंबेडकर यांच्या पुतळ्याला अभिवादन करण्यात आले. भदंत भारद्वाज आणि उपस्थित भिक्खू संघाने धम्म देशना देत भगवान बुद्धांच्या विचारांचे महत्त्व विशद केले. धम्म क्रांती बुद्ध विहार, रमाई महिला मंडळ नगरसूल, पंचशील ग्रुप तसेच संघर्ष मित्र मंडळ आणि रेल्वे स्टेशन नगरसूल यांच्या वतीने हा कार्यक्रम आयोजित करण्यात आला होता. कार्यक्रमात धम्मविचार, सामाजिक एकता, बंधुता आणि मानवतेचा संदेश देण्यात आला.

स्रोत: मूळ बातमी