लातूर शहरात ज्येष्ठ नागरिकांच्या मानसिक आरोग्य आणि आपत्कालीन परिस्थितीतील सुरक्षितता या विषयांवर एकदिवसीय कार्यशाळा घेण्यात आली. सामाजिक न्याय व सक्षमीकरण मंत्रालय, सामाजिक परिवर्तन अध्ययन केंद्र (मुंबई), प्रादेशिक संसाधन केंद्र (मुंबई) आणि ज्येष्ठ नागरिक संघ (लातूर) यांच्या संयुक्त विद्यमाने हा कार्यक्रम आयोजित करण्यात आला होता. कार्यशाळेच्या निमित्ताने समाजासाठी मोलाचे योगदान दिलेल्या ज्येष्ठांचा जीवनगौरव पुरस्कार देऊन गौरव करण्यात आला.
सात ज्येष्ठांचा सन्मान
या प्रसंगी चंद्रकांत नारायणराव जोशी, व्यंकटराव नारायणराव ढगे, बसवराज विश्वनाथ उटगे, गौतमचंद विठ्ठलराव देशमाने, अशोक गोस्वामी, मंगला सास्तुरकर आणि चंद्रकांत नारायणराव साळुंखे या सात ज्येष्ठ नागरिकांचा सत्कार करण्यात आला. त्यांच्या दीर्घकाळच्या सामाजिक कार्याची आणि भरीव योगदानाची दखल घेऊन हा सन्मान देण्यात आला. कार्यक्रमाला लातूरच्या उपविभागीय अधिकारी रोहिणी नऱ्हे-विरोळे, सामाजिक न्याय विभागाचे सहायक उपायुक्त यादव गायकवाड, प्रादेशिक उपायुक्त अविनाश देवशेटवार यांच्यासह अनेक मान्यवर उपस्थित होते.
तीन सत्रांतून मार्गदर्शन
कार्यशाळेत तीन सत्रे घेण्यात आली. पहिल्या सत्रात रोहिणी नऱ्हे-विरोळे यांनी माता-पिता व ज्येष्ठ नागरिकांचे पालनपोषण आणि कल्याण अधिनियम २००७, ज्येष्ठ नागरिक न्यायाधीकरणाचे अधिकार, कार्यपद्धती आणि तक्रार निवारण प्रक्रिया याबद्दल सखोल माहिती दिली. दुसऱ्या सत्रात डॉ. आशिष चेपुरे यांनी ज्येष्ठांच्या मानसिक आरोग्य व भावनिक स्वास्थ्य या विषयावर मार्गदर्शन केले. तिसऱ्या सत्रात डॉ. ऋषिकेश हरिदास यांनी आपत्कालीन परिस्थितीत सुरक्षितता कशी राखावी, यावर प्रात्यक्षिकासह संवाद साधला. नीलिमा येतकर यांनी मनोरंजनात्मक कार्यक्रम सादर केले, तर सुनीता बोरगावकर आणि उषा शिंदे यांनी सूत्रसंचालन केले. शेवटी बोरगावकर यांनी आभार मानले.
स्रोत: मूळ बातमी
Leave a Reply