जळगाव शहरात दिवाळीच्या सणाची चाहूल लागली असून बाजारपेठेत पारंपरिक फराळाचा खमंग दरवळ पसरू लागला आहे. चकली, चिवडा, शेव, शंकरपाळे, करंजी आणि लाडू अशा पारंपरिक पदार्थांची मागणी वाढली आहे. त्यामुळे केटरर्स आणि फराळ विक्रेत्यांची दुकाने सजली आहेत.
या वर्षी अनेक कुटुंबे दोन पर्याय स्वीकारत आहेत. काही पदार्थ तयार विकत घेणे आणि काही पदार्थ मजुरी देऊन घरी बनवून घेणे, असा समतोल साधला जात आहे. घरात स्वतः फराळ तयार करण्यासाठी लागणारा वेळ आणि श्रम वाचवता येत असल्याने अधिक प्रमाणात फराळ बनवून घेण्याचा पर्याय अनेकजण निवडत आहेत.
मजुरीचे दर किती?
फराळ बनवून घेण्यासाठी साधारण १२५ रुपये प्रति किलो प्रमाणे मजुरी आकारली जात आहे. गोड पदार्थांसाठी २०० रुपये प्रमाणे मजुरी घेतली जात आहे. या पद्धतीत नागरिक स्वतःचे साहित्य देतात आणि आवश्यकतेनुसार पदार्थ तयार करून घेतात. त्यामुळे घरगुती चव टिकून राहते आणि पदार्थांचे प्रमाणही गरजेनुसार ठरवता येते.
तयार फराळालाही मागणी
बाजारातील फराळ विक्रेत्यांकडे तयार पदार्थांसह विविध प्रकारची पाकिटे उपलब्ध आहेत. चवीतील वैविध्य, वेळेची बचत आणि सोय यामुळे तयार फराळ खरेदीलाही चांगली मागणी आहे. दिवाळी जसजशी जवळ येत आहे, तसतशी फराळ खरेदी आणि बनवून घेण्याच्या कामांना वेग येत आहे. व्यावसायिक जसराज महाराज यांच्या मते, नोकरी आणि व्यवसायामुळे अनेकांना घरी फराळ बनवायला वेळ मिळत नाही, त्यामुळे नागरिक साहित्य उपलब्ध करून देतात आणि मजुरी देऊन फराळ तयार करून घेतात.
स्रोत: मूळ बातमी
Leave a Reply