बेलापूरमध्ये ३ ते ७ नोव्हेंबरला उमेद दिवाळी फराळ महोत्सव

दिवाळी जवळ आली की घरोघरी आणि बाजारपेठेत फराळाचा सुगंध दरवळू लागतो. मात्र बाजारात मिळणारा भेसळयुक्त किंवा जुना साठवलेला फराळ पाहून आरोग्याची चिंता वाटणे स्वाभाविक आहे. यावर उपाय म्हणून उमेद-राज्य ग्रामीण जीवनोन्नती अभियानातर्फे बेलापूर येथील अर्बन हाटमध्ये ३ ते ७ नोव्हेंबर या कालावधीत उमेद दिवाळी फराळ महोत्सवाचे आयोजन करण्यात आले आहे.

डोळ्यांसमोर तयार होणारा ताजा फराळ

या महोत्सवाचे मुख्य वैशिष्ट्य म्हणजे ग्राहकांना त्यांच्या डोळ्यांसमोर तयार केलेला शंभर टक्के शुद्ध आणि गरमागरम ताजा फराळ मिळणार आहे. फराळ बनवण्यासाठी लागणारे तेल, बेसन व इतर साहित्य थेट शेतकरी महिलांच्या शेतातून आलेले आहे. त्यामुळे या फराळात कोणत्याही प्रकारची भेसळ नसल्याची हमी दिली जात आहे.
सामान्यतः बाजारात आधीच पॅकबंद केलेला फराळ मिळतो. परंतु या महोत्सवात महाराष्ट्रातील बचत गटांच्या महिला ग्राहकांच्या डोळ्यांसमोर गरमागरम चकल्या, लाडू, करंज्या आणि चिवडा तयार करून देणार आहेत. ग्राहकांच्या आवडीनुसार साजूक तुपातील किंवा शेंगदाणा तेलातील फराळ बनवून मिळण्याची सोयही उपलब्ध आहे. ग्राहकांना स्वतः फराळ बनवण्याच्या प्रक्रियेत सहभागी होण्याची संधीही मिळणार आहे.

स्वच्छतेचे कडक नियम आणि महिलांचे सक्षमीकरण

महोत्सव परिसरात आरोग्य आणि स्वच्छतेच्या दृष्टीने कडक नियम पाळले जाणार आहेत. फराळ तयार करणाऱ्या महिला हातमोजे, ऍप्रन आणि हेअर कॅप घालून पूर्ण स्वच्छतेत फराळ बनवतील. ग्रामीण महिलांच्या सक्षमीकरणाला हातभार लावत अस्सल चवीची दिवाळी साजरी करण्यासाठी नवी मुंबई व परिसरातील नागरिकांनी बेलापूर रेल्वे स्थानकाजवळील अर्बन हाट येथील या महोत्सवाला भेट द्यावी, असे आवाहन उमेद अभियानाचे मुख्य कार्यकारी अधिकारी श्रीधर डुबे-पाटील यांनी केले आहे.

स्रोत: मूळ बातमी