हळद विक्रीतील बटाव थांबवा; बाजार समितीचा आडत्यांना इशारा

मराठवाडा आणि विदर्भात हळद खरेदी-विक्रीचे प्रमुख केंद्र म्हणून ओळखल्या जाणाऱ्या हिंगोली कृषी उत्पन्न बाजार समितीच्या मार्केट यार्डात शेतकऱ्यांकडून बटाव वसूल केला जात असल्याच्या तक्रारी प्राप्त झाल्या होत्या. हळद विक्री केल्यानंतर शेतकऱ्यांना तत्काळ पैसे हवे असल्यास एक ते दीड टक्का बटाव कापला जातो. यात शेतकऱ्यांना नाहक भुर्दंड बसतो. तक्रारींची गंभीर दखल घेत बाजार समितीने बुधवारी यापुढे बटाव किंवा नियमबाह्य कपात केल्यास थेट कारवाई केली जाईल, असा इशारा दिला आहे.

बाजार समितीचे कडक निर्देश

बाजार समितीच्या सचिवांनी सर्व आडत व्यापाऱ्यांना निर्देशपत्र जारी केले आहे. त्यानुसार यापुढे कोणत्याही अनुज्ञप्तीधारक आडत्याने शेतकऱ्यांच्या शेतमालाच्या विक्री रकमेवर कोणत्याही प्रकारचा बटाव अथवा बाजार समितीने ठरवून दिलेल्या कायदेशीर कपातीव्यतिरिक्त एकही रुपयाची अतिरिक्त कपात करू नये, अशी सक्त ताकीद देण्यात आली आहे. नियमाला बगल देण्याचा प्रयत्न केल्यास कारवाई केली जाईल, असे समितीने स्पष्ट केले आहे.

हळदीची आवक आणि व्यापाऱ्यांची बाजू

हंगाम संपलेला असतानाही सध्या दररोज दीड ते दोन हजार क्विंटल हळदीची आवक होत आहे. हंगामात दररोज सुमारे पाच ते सहा हजार क्विंटलची आवक होते. लहान असो वा मोठा, प्रत्येक शेतकऱ्याच्या हळदीची विक्री पट्टी सहसा एक लाख रुपयांच्या पुढेच जाते. हिंगोलीसह विदर्भातील यवतमाळ, वाशीम आणि वर्धा जिल्ह्यांतील शेतकरी हळद विक्रीसाठी हिंगोलीचे मार्केट यार्ड गाठतात. दुसरीकडे, हळद खरेदी केल्यानंतर खरेदीदारांकडून एक ते दीड महिना पैसे मिळत नाहीत, तर शेतकरी आडत्यांकडे रोख रकमेची मागणी करतात; त्यामुळे रोख पैसे आणायचे कोठून, असा प्रश्न असल्याचे एका आडत व्यापाऱ्याने सांगितले. मात्र शेतकऱ्यांचे म्हणणे आहे की, मोठ्या कष्टाने पिकवलेल्या शेतमालाच्या पैशातून बटाव कापणे चुकीचे आहे आणि बाजार समितीच्या निर्णयामुळे आता दिलासा मिळेल.

स्रोत: मूळ बातमी