सप्तशृंग गडावर कोजागिरी पौर्णिमा उत्सव, कावड यात्रा आणि तृतीयपंथीयांच्या छबिना सोहळ्याची भक्तिमय वातावरणात सांगता झाली. मंत्रघोषाने दुमदुमलेला गड, ‘अंबे माता की जय’ आणि ‘सप्तशृंगी माते की जय’चा जयघोष आणि कावडधारकांच्या श्रद्धेने भारावलेले वातावरण यात हा सोहळा पार पडला.
गडावर ११ ते २० ऑक्टोबरदरम्यान नवरात्रोत्सव पार पडला होता. त्यानंतर २५ ते २७ ऑक्टोबर या कालावधीत कोजागिरी पौर्णिमा उत्सव आणि कावड यात्रेचे आयोजन करण्यात आले होते. या उत्सवाच्या निमित्ताने हजारो भाविकांनी गडावर हजेरी लावत सप्तशृंगी मातेचे दर्शन घेतले. विविध तीर्थक्षेत्रांवरून कावडींतून आणलेले पवित्र जल देवीच्या अभिषेकासाठी अर्पण करण्याची परंपरा यंदाही श्रद्धापूर्वक पार पडली.
१४०० लिटर तीर्थजलाने महाभिषेक
रविवारी मध्यरात्री बाराच्या सुमारास विविध तीर्थक्षेत्रांवरून कावडधारकांनी आणलेले तीर्थजल एकत्रित करण्यात आले. या जलाचे संकलन करून सुमारे १४०० लिटर तीर्थजल अभिषेकासाठी उपलब्ध झाले. या पवित्र जलाने श्री भगवतीच्या मूळ मूर्तीवर पंचामृतासह ११ पुरोहितांच्या मंत्रघोषात महाभिषेक करण्यात आला. विश्वस्त संस्थेचे अध्यक्ष तथा सहधर्मादाय आयुक्त विवेक सोनूने व तहसीलदार रोहिदास वारुळे यांच्या हस्ते सपत्नीक महापूजा करण्यात आली.
सुवर्णालंकारांनी सजले देवीचे रूप
महापूजेच्या निमित्ताने आदिमाया सप्तशृंगी भगवतीच्या मूर्तीला विविध सुवर्ण आणि रौप्य अलंकारांनी सजविण्यात आले होते. सोन्याचे मंगळसूत्र, वज्रटिक, मयूर हार, मोहनमाळ, कर्णफुले, नथ आणि पाऊल, तसेच चांदीचा कमरपट्टा व मुकुट अशा अलंकारांनी देवीचे रूप अधिक तेजस्वी भासत होते. सोमवारी, २६ ऑक्टोबरला सकाळी देवीची पंचामृत महापूजा, तर दुपारी बाराला नैवेद्य आरती नित्यनियमाने पार पडली आणि त्यानंतर कोजागिरी पौर्णिमेच्या मुख्य धार्मिक कार्यक्रमांची सांगता झाली.
स्रोत: मूळ बातमी
Leave a Reply