शून्यातून उभे केले विश्व: नामदेव बरकडे यांची वाटचाल

हक्काचे घर किंवा स्वतःचा प्लॉट घेताना विश्वास, गुणवत्ता आणि पारदर्शक व्यवहार यांना प्राधान्य देणे महत्त्वाचे असते. याच विश्वासाच्या बळावर अल्पावधीत गृहबांधकाम आणि प्लॉटिंग व्यवसायात स्वतःची वेगळी ओळख निर्माण करणारे नाव म्हणजे स्वरूप डेव्हलपर्स. नामदेव बरकडे यांनी सुरू केलेल्या या संस्थेने खंडाळा, शिरवळ आणि लोणंद परिसरात आपल्या कामाचा ठसा उमटवला आहे.

खंडाळा तालुक्यातील हरळी येथील बरकडे यांनी संघर्ष, जिद्द, दूरदृष्टी आणि प्रामाणिकपणाच्या जोरावर शून्यातून स्वतःचे विश्व उभे केले आहे. त्यांचा हा प्रवास नव्या पिढीसाठी निश्चितच प्रेरणादायी ठरतो.

हलाखीतून शिक्षणाची वाटचाल

नामदेव बरकडे यांचे प्राथमिक शिक्षण हरळी येथे, तर माध्यमिक व उच्च माध्यमिक शिक्षण खंडाळा येथे झाले. पुढील उच्च शिक्षण त्यांनी पुण्यातून पूर्ण केले. मुलाने उच्च शिक्षण घ्यावे, ही आई-वडिलांची प्रबळ इच्छा आणि त्यासाठी त्यांनी घेतलेले कष्ट हीच त्यांच्या यशस्वी प्रवासाची खरी प्रेरणा ठरली.

घरची आर्थिक परिस्थिती अत्यंत हलाखीची असताना शेळ्या-मेंढ्या आणि शेतीच्या उत्पन्नावर कुटुंबाचा उदरनिर्वाह सुरू होता. मात्र या परिस्थितीने त्यांची शिक्षणाची जिद्द कमी झाली नाही. बारावीपासून पदवीपर्यंत अकाउंट्स विषयात त्यांनी बोर्ड, जिल्हा आणि पुणे विभागात प्रथम क्रमांक मिळवण्याची उल्लेखनीय कामगिरी केली.

नोकरीतून व्यवसायाकडे

सन २००० ते २०२१ या काळात त्यांनी विविध बहुराष्ट्रीय कंपन्यांमध्ये उच्च पदांवर काम केले. या काळात व्यवस्थापन, आर्थिक नियोजन, व्यवहारातील पारदर्शकता आणि व्यावसायिक शिस्त यांचा मोठा अनुभव त्यांना मिळाला. मात्र स्वतःचा व्यवसाय उभारण्याची इच्छा त्यांच्या मनात कायम होती.

बिल्डिंग आणि डेव्हलपमेंट क्षेत्रात स्वतःची ओळख निर्माण करण्याचा त्यांनी निर्धार केला. श्रीपाद जाधव यांच्याकडून त्यांना विशेष प्रेरणा मिळाली. नातेवाईक सुरेश धायगुडे, किसन बरकडे तसेच मित्रपरिवाराच्या साथीने त्यांनी २०१३ मध्ये स्वरूप डेव्हलपर्सच्या माध्यमातून व्यवसायाची सुरुवात केली.

व्यवसायाच्या वाटचालीत नोटाबंदी, रेरा कायद्याची अंमलबजावणी, आर्थिक मंदी आणि त्यानंतर आलेले कोरोनाचे संकट अशा अनेक आव्हानांचा त्यांना सामना करावा लागला. कोरोना काळात बांधकाम क्षेत्रातील व्यवहार ठप्प झाले होते. तरीही त्यांनी संयम आणि दूरदृष्टीने परिस्थितीचा सामना केला, ग्राहकांशी सातत्याने संपर्क ठेवला आणि दिलेला शब्द पूर्ण करण्यावर भर दिला. २०१७-१८ च्या आर्थिक मंदीच्या काळातही त्यांनी प्रकल्प पूर्ण करून ग्राहकांना त्यांच्या सदनिका सुपूर्द केल्या. पुढे २०२१ मध्ये नोकरीचा राजीनामा देऊन त्यांनी पूर्णवेळ व्यवसायात उतरण्याचा धाडसी निर्णय घेतला.

व्यवसायासोबतच सामाजिक बांधिलकीही त्यांनी जपली आहे. खंडाळा तालुक्यातील शेतकऱ्यांच्या पाण्याच्या प्रश्नासाठी नीरा-देवघर व धोम-बलकवडी सिंचन योजनांच्या पाण्यासाठी त्यांनी जनचळवळ उभी केली आहे. कोणत्याही राजकीय पक्षाचे लेबल न लावता केवळ शेतकऱ्यांचे हित डोळ्यांसमोर ठेवून त्यांनी मंत्री, लोकप्रतिनिधी आणि संबंधित अधिकाऱ्यांकडे पत्रव्यवहार व पाठपुरावा केला आहे. येत्या पाच वर्षांत खंडाळा, शिरवळ आणि लोणंद या विकसित होत असलेल्या शहरांमध्ये गृहप्रकल्प आणि प्लॉटिंग क्षेत्रात विस्तार करण्याचा त्यांचा मानस आहे.

स्रोत: मूळ बातमी