वसमत तालुक्यातील गिरगाव येथील ऐतिहासिक खंडोबा मंदिर परिसरात शुक्रवारी संत बाळूमामांचा जन्मोत्सव अत्यंत भक्तिभावाने आणि उत्साही वातावरणात साजरा करण्यात आला. या जन्मोत्सवानिमित्त दिवसभर विविध धार्मिक व सांस्कृतिक कार्यक्रमांचे आयोजन करण्यात आले होते. गावातील महिला, तरुण मंडळी आणि भाविक मोठ्या संख्येने या सोहळ्यात सहभागी झाले होते.
दिवसभर धार्मिक व सांस्कृतिक कार्यक्रम
दुपारी तीन ते चार या वेळेत गावातील महिला मंडळाच्या वतीने पाळणा बांधून पारंपरिक भक्तिगीते व बाळूमामांची गाणी गात मोठ्या उत्साहात जन्मोत्सव साजरा करण्यात आला. जन्मोत्सवानंतर उपस्थित भाविकांना महाप्रसादाचे वाटप करण्यात आले. रात्री आठ ते दहा या वेळेत नागेलीकर महाराज यांच्या सुश्राव्य कीर्तनाचा कार्यक्रम पार पडला. महाराजांनी आपल्या कीर्तनातून संत बाळूमामांच्या जीवनकार्यावर व शिकवणीवर प्रकाश टाकला.
रांगोळी प्रतिमा ठरली आकर्षण
या सोहळ्यानिमित्त कलाकार शिवाजी साखरे यांनी रांगोळीच्या माध्यमातून साकारलेली संत बाळूमामांची हुबेहूब प्रतिमा भाविकांचे विशेष आकर्षण ठरली. या जन्मोत्सव सोहळ्यास कल्याणराव नादरे, खंडोबा देवस्थान समितीचे अध्यक्ष एकनाथ साखरे, बबनराव मेने, सीताराम साखरे, माणिक दाळपुसे, चांदोजी माळवटकर, तुकाराम पितळे, विठ्ठल दाळपुसे, व्यंकटी नादरे, विठ्ठल हट्टेकर, लखन चंदेवार, पांडुरंग नादरे आणि मोतीराम साखरे यांच्यासह अनेक गावकरी उपस्थित होते.
स्रोत: मूळ बातमी
Leave a Reply