ठाण्यातील तरुणाईसाठी स्टार्टअपच्या नव्या संधी, करिअरविषयक मार्गदर्शन, आधुनिक आरोग्य तंत्रज्ञान आणि हॅलोविनचा जल्लोष अशा विविध उपक्रमांची मेजवानी घेऊन ‘जुनून ठाणे युवा महोत्सव’ येत आहे. सिद्धांत प्रतिष्ठानच्या वतीने आयोजित या महोत्सवाला ३१ ऑक्टोबरपासून सुरुवात होत असून, तीन हात नाका येथील बाळासाहेब ठाकरे कलादालनात दोन दिवस हा महोत्सव रंगणार आहे. महाविद्यालयीन विद्यार्थ्यांसह करिअर आणि उद्योजकतेच्या नव्या वाटा शोधणाऱ्या तरुणांसाठी हा महोत्सव पर्वणी ठरणार आहे.
शनिवार-रविवारचा कार्यक्रम
शनिवारी सकाळी १० वाजता महोत्सवाची सुरुवात होणार असून, सकाळी ११ वाजता ‘इटर्नल ठाणे’ या विशेष सादरीकरणातून शहराचा ऐतिहासिक वारसा उलगडला जाणार आहे. त्यानंतर करिअर, नेतृत्वविकास, विविध स्पर्धा, गेमिंग आणि आरोग्यविषयक उपक्रमांची रेलचेल असेल. स्वतःचा व्यवसाय सुरू करू इच्छिणाऱ्या तरुणांसाठी स्टार्टअपविषयक कार्यशाळा, उद्योजकांसाठी मार्गदर्शनपर सत्रे, प्रेरणादायी व्याख्याने आणि गुंतवणूकदारांशी संवाद साधण्याची संधी मिळणार आहे. रविवारी होणाऱ्या ‘स्टार्टअप पिच स्पर्धे’तून नवोदित उद्योजकांना आपल्या कल्पना मांडता येणार आहेत.
आरोग्य तंत्रज्ञान आणि हॅलोविन
महोत्सवात करिअर झोन, ठाण्याच्या ऐतिहासिक वारशाचे दर्शन घडविणारे प्रदर्शन, मानसिक आरोग्य व स्वास्थ्यासाठी ‘फुलपाखरू’ विभाग आणि ‘फ्युचर ऑफ हेल्थ झोन’ उभारण्यात येणार आहेत. कृत्रिम बुद्धिमत्तेच्या साह्याने त्वचेचे स्कॅनिंग, क्रायोथेरपी, रेड लाइट थेरपी, ईएमएस सूट, लिम्फॅटिक कॉम्प्रेशन, हायड्रोजन इनहेलेशन आणि पायांचे विश्लेषण अशा आधुनिक तंत्रज्ञानाधारित सुविधांची माहिती व अनुभव तरुणांना घेता येणार आहे. शनिवारी संध्याकाळी हॅलोविनच्या विशेष सोहळ्यात कविता, संगीत, कथाकथन आणि स्टँडअप कॉमेडीचे सादरीकरण होणार आहे.
स्रोत: मूळ बातमी
Leave a Reply