कोल्हापुरातील गोकुळ दूध महासंघाची निवडणूक नेहमीच प्रतिष्ठेची मानली जाते. संपूर्ण राज्याचं लक्ष लागलेल्या या अटीतटीच्या निवडणुकीचा निकाल नुकताच जाहीर झाला असून, काँग्रेस नेते सतेज पाटील यांच्या पॅनेलने विजय मिळवला आहे. या विजयानंतर आता गोकुळ दूध संघाच्या नव्या अध्यक्षाच्या निवडीकडे सगळ्यांचं लक्ष लागलं आहे.
अध्यक्ष निवडीच्या सभेसाठी 14 संचालकांचा कोरम आवश्यक आहे. सतेज पाटील यांच्या नेतृत्वाखालील समविचारी आघाडीकडे सध्या 13 संचालक आहेत, तर महायुतीकडे 12 संचालक आहेत. दोन्ही आघाड्यांमध्ये फक्त एका जागेचं अंतर असल्यामुळे अध्यक्ष निवडीत तांत्रिक पेच निर्माण होण्याची शक्यता व्यक्त केली जात आहे. सध्या राज्यात आणि केंद्रात महायुतीचं सरकार असून त्यांचा दबदबा असल्याने, अशा परिस्थितीत संचालकांची फोडाफोडी होण्याची शक्यता नाकारता येत नाही.
फोडाफोडी टाळण्यासाठी संचालकांना सहलीला
अध्यक्ष निवडीपूर्वी संचालकांची फोडाफोडी होऊ नये यासाठी दोन्ही आघाड्यांकडून खबरदारी घेतली जात आहे. ठराव धारकांनंतर आता निवडून आलेल्या संचालकांना सहलीवर पाठवण्यात येत आहे. सतेज पाटील यांनी आपल्या गटाच्या 13 नूतन संचालकांना सहलीवर पाठवलं आहे. सहलीला जाण्यापूर्वी सर्व संचालकांनी आप्पाचीवाडी येथे हालसिद्धनाथ देवाचे दर्शन घेतलं. महायुतीच्या संचालकांनाही लवकरच सहलीवर पाठवले जाणार आहे. येत्या 29 ऑक्टोबर रोजी गोकुळच्या नव्या अध्यक्षाची निवड होणार आहे.
कोल्हापुरातील दोन मोठ्या घराण्यांना पराभवाचा फटका
या निवडणुकीत कोल्हापुरातील राजकारणातील दोन मोठ्या घराण्यांना पराभवाचा सामना करावा लागला. हसन मुश्रीफ यांचे सुपूत्र नविद मुश्रीफ आणि खासदार धनंजय महाडिक यांच्या कुटुंबातील सदस्य शौमिका महाडिक यांचा पराभव झाला. शौमिका महाडिक यांची दोनदा आणि युवराज पाटील यांची तीन वेळा फेरमतमोजणी झाली. मात्र, या सर्व फेरमतमोजणीनंतर सतेज पाटील यांच्या पॅनेलच्या विजयावर शिक्कामोर्तब झालं. गोकुळच्या निवडणुकीतील विजय हा फक्त प्रतिष्ठेचा विषय नसतो, तर त्यावर भविष्यातील राजकीय आडाखे ठरवले जातात.
स्रोत: मूळ बातमी
Leave a Reply