खानापूर : कारवरील ताबा सुटल्याने झालेल्या भीषण अपघातात चालक ठार झाला आहे. गुंजी-लोंढा महामार्गावरील वाटरे-जोमतळे दरम्यानच्या धोकादायक वळणावर गुरुवारी (दि. २२) रात्री साडेदहाच्या सुमारास हा अपघात घडला. विनोद संभाजी गुरव (वय ३९, रा. गुंजी, ता. खानापूर) असे मृत चालकाचे नाव आहे. ऐन श्री माऊली देवी यात्रोत्सवात ही दुर्घटना घडल्याने गुंजी गावावर शोककळा पसरली आहे.
धोकादायक वळणावर कार अनियंत्रित
मिळालेल्या माहितीनुसार, विनोद हे कामानिमित्त गोव्यात वास्तव्यास होते. माऊली देवी यात्रोत्सवासाठी ते गुंजीत आले होते. गुरुवारी सकाळी कामावर रूजू होण्यासाठी ते पुन्हा गोव्याला गेले होते. रात्री कामावरून परतताना वाटरे-जोमतळे दरम्यान त्यांच्या कारने ताबा सोडला आणि अपघात झाला. अपघातात कारचा चक्काचूर झाला.
यात्रोत्सवात शोककळा
गुंजी गावात सध्या श्री माऊली देवीचा यात्रोत्सव सुरू आहे. अशा आनंदोत्सवाच्या काळात घडलेल्या या दुर्घटनेमुळे गावावर शोककळा पसरली आहे. अपघाताची बातमी समजताच नातेवाईक आणि गावकऱ्यांनी घटनास्थळी धाव घेतली. पोलिसांनी घटनेची नोंद घेतली असून पुढील तपास सुरू आहे.
स्रोत: मूळ बातमी
Leave a Reply