कुंभमेळ्यानंतरही नाशिकची सुरक्षा व्यवस्था बळकट राहणार

सिंहस्थ कुंभमेळा संपल्यानंतरही त्यानिमित्त उभारलेल्या सुविधा, आधुनिक उपकरणे आणि प्रशिक्षित मनुष्यबळ नाशिकमध्येच राहणार आहे. नाशिक शहराचे पोलिस आयुक्त संदीप कर्णिक यांनी ध्वजारोहण विशेष पुरवणी लेखात ही भूमिका मांडली आहे. सीसीटीव्ही शहरावर अखंड नजर ठेवतील आणि नवीन वाहने कोणत्याही आपत्कालीन परिस्थितीत मदतीला धावून येतील. कुंभमेळ्याच्या निमित्ताने मिळालेले प्रशिक्षण आणि पायाभूत सुविधा भविष्यात नाशिक शहराच्या सुरक्षेची मजबूत आणि कायमस्वरूपी ताकद बनतील, असा विश्वास त्यांनी व्यक्त केला आहे.

सिंहस्थ हे केवळ एका मोठ्या धार्मिक सोहळ्याच्या सुरक्षेचे नियोजन करण्याचे आव्हान नसून, शहराच्या संपूर्ण सुरक्षाव्यवस्थेला अधिक सक्षम आणि आधुनिक करण्याची मोठी संधी आहे. कुंभमेळ्यानिमित्त तयार केल्या जात असलेल्या साधनसामग्री, पायाभूत सुविधा आणि अद्ययावत यंत्रणा सोहळा संपल्यानंतरही पोलिसांच्या दैनंदिन सेवेत कायमस्वरूपी उपयुक्त ठरणार आहेत. कोणतीही अप्रिय घटना न घडता सिंहस्थ पार पडावा यासाठी सर्वतोपरी प्रयत्न सुरू आहेत. आधुनिक एआय आधारित तंत्रज्ञानाच्या मदतीने बंदोबस्ताचे सूक्ष्म नियोजन केले जात असून, शहरात येणाऱ्या प्रत्येक व्यक्तीची नोंद एआय आधारित सीसीटीव्हीच्या माध्यमातून होणार आहे.

सीसीटीव्ही आणि विशेष वाहनांचा कायमस्वरूपी ताफा

शहराच्या सुरक्षेसाठी तीन हजार सीसीटीव्ही बसवले जात आहेत. कुंभमेळ्यानंतरही हे सीसीटीव्ही शहरात कायमस्वरूपी कार्यरत राहतील. गुन्हेगारीला आळा घालणे, गुन्ह्यांचा तपास, संशयित हालचालींवर लक्ष, वाहतूक नियंत्रण आणि गर्दीचे व्यवस्थापन यासाठी या प्रणालीचा नियमित वापर केला जाईल. सिंहस्थासाठी येणाऱ्या सुमारे ३५ ते ४० हजार पोलिस अधिकारी व कर्मचाऱ्यांच्या निवासाची भक्कम व्यवस्था केली जात आहे. विद्यमान बॅरेक्सच्या दुरुस्तीसोबतच विविध पोलिस ठाण्यांच्या आवारात नवीन शेड्स उभारून निवासाची सोय केली जात आहे. ही सुविधा केवळ कुंभमेळ्यापुरती मर्यादित न राहता, भविष्यातील नवीन पोलिस भरती आणि बाहेरून येणाऱ्या अतिरिक्त पोलिस बलासाठी दीर्घकाळ उपयोगी पडणार आहे. सिंहस्थासाठी नवीन पोलिस वाहनांसोबतच बॉम्बशोधक व नाशक पथकाची वाहने, श्वानपथकाची वाहने, बुलेटप्रूफ वाहने, क्विक रिस्पॉन्स टीमची वाहने आणि वॉटर कॅनन उपलब्ध केली जात आहेत. या वाहनांचा उपयोग भविष्यातील नियमित गस्त, आपत्कालीन प्रतिसाद, गुन्हे तपास आणि धार्मिक सोहळ्यांच्या बंदोबस्तात केला जाईल.

प्रशिक्षण आणि वाहतूक नियोजन

सिंहस्थानिमित्त पोलिस अधिकारी, कर्मचारी आणि होमगार्ड्सना विशेष प्रशिक्षण दिले जात आहे. गर्दी आणि वाहतूक व्यवस्थापन, आपत्ती व्यवस्थापन व नदीपात्रातील बचावकार्य, सायबर गुन्हे आणि ड्रोन तंत्रज्ञानाचा वापर, सीसीटीव्ही व आधुनिक उपकरणांचा वापर, तसेच क्यूआरटीची कार्यप्रणाली व आपत्कालीन प्रतिसाद यांचा या प्रशिक्षणात समावेश आहे. बॅरिकेड्स, वायरलेस व संवादाची साधने, बीडीडीएस उपकरणे आणि गर्दी नियंत्रणाची साधने नाशिक पोलिसांच्या ताफ्यात कायम राहतील. सिंहस्थाच्या अनुषंगाने रस्त्यांची कामे प्रगतिपथावर असून, येत्या मार्चपर्यंत ९० टक्के कामे पूर्ण होतील. जानेवारी-फेब्रुवारीपर्यंत द्वारका सर्कल येथील काम पूर्णत्वास जाईल, ज्यामुळे तेथील वाहतूक कोंडीची समस्या कायमची सुटण्यास मदत होणार आहे. बाह्य रिंग रोडमुळे शहरांतर्गत वाहतूक सुरळीत होण्यास मदत होणार आहे. बाह्य वाहनतळावरून घाटानजीकच्या वाहनतळापर्यंत भाविकांना मोफत शटल बससेवा उपलब्ध असणार आहे. प्रत्येक चौकात भाविकांना मार्ग दाखविण्यासाठी वाहतूक पोलिस असणार आहेत. बॅरिकेडिंग टप्प्याटप्प्याने केले जाईल. शाही पर्वणीकाळात शहरातील प्रमुख रस्ते बंद असतील, परंतु त्याच वेळी रुग्णवाहिका आणि महत्त्वाच्या खरेदीसाठीचे मार्ग खुले असतील.

स्रोत: मूळ बातमी