हैदराबादमध्ये २६/११ सारख्या दहशतवादी हल्ल्याची धमकी देणारे पत्र मिळाल्यानंतर शहरात खळबळ उडाली आहे. लष्कर-ए-तैयबा या दहशतवादी संघटनेच्या नावाने हे धमकीचे पत्र आले असून त्यानंतर हैदराबाद पोलीस हाय अलर्टवर आले आहेत. या पत्रात शहरात दोन बॉम्बस्फोट घडवून आणण्याचा इशारा देण्यात आला आहे. किमान ३०० लोकांचा बळी घेण्याचा कट रचल्याचे पत्रात म्हटले आहे. तसेच २६ नोव्हेंबर २००८ रोजी मुंबईत झालेल्या दहशतवादी हल्ल्याची पुनरावृत्ती केली जाईल आणि त्याच तारखेला हैदराबादमध्ये हल्ला केला जाईल, अशी धमकी देण्यात आली आहे.
धमकीचे पत्र आणि त्यामागील कारण
हैदराबाद शहर पोलीस दलाच्या सहपोलीस आयुक्तांनी (विशेष शाखा) वरिष्ठ पोलीस अधिकाऱ्यांना पाठवलेल्या एका अधिकृत पत्रात या धमकीचा तपशील देण्यात आला आहे. या पत्रानुसार धमकी देणाऱ्या व्यक्तीने शहरात दोन बॉम्बस्फोट घडवून आणण्याचा स्पष्ट उल्लेख केला आहे. त्यांचे उद्दिष्ट किमान ३०० लोकांना लक्ष्य करण्याचे आहे. यासह त्याच तारखेला हैदराबादमध्ये दहशत पसरवण्याची धमकीही देण्यात आली आहे. पत्रात दिलेल्या माहितीनुसार ही धमकी दक्षिण काश्मीरमध्ये सक्रिय असलेल्या लष्कर-ए-तैयबाचा दहशतवादी लतीफ भट याच्या मृत्यूचा बदला घेण्यासाठी देण्यात आली आहे. १८ नोव्हेंबर रोजी जम्मू-काश्मीरमधील कुलगाम जिल्ह्यातील जंगलपोरा भागात सुरक्षा दलांसोबत झालेल्या चकमकीत लतीफ भट मारला गेला होता. पत्रात त्याला लष्करचा दहशतवादी म्हणून संबोधले असून त्याच्या मृत्यूचा बदला घेण्याचा उल्लेख करण्यात आला आहे.
शहरात सुरक्षा व्यवस्था कडक
एका धमकीवजा पत्रामुळे हैदराबाद पोलीस प्रशासन सतर्क झाले आहे. शहरातील गर्दीची सार्वजनिक ठिकाणे, यात काचेगुडा येथील हॉटेल टुरिस्ट प्लाझा आणि काचेगुडा रेल्वे स्थानकाचा समावेश आहे. तसेच इतर हॉटेल्स, रेल्वे व बस स्थानके, धार्मिक स्थळे आणि इतर संवेदनशील ठिकाणांवर सुरक्षा व्यवस्था अधिक कडक करण्याच्या आणि पाळत ठेवण्याची यंत्रणा बळकट करण्याच्या सूचना देण्यात आल्या आहेत. पोलीस दलाने या धमकीची गंभीर दखल घेतली असून शहरभर सतर्कता वाढवण्यात आली आहे.
Leave a Reply