सोनं खरेदी करण्याचा विचार करत असाल, तर सध्याची घसरण तुमच्यासाठी दिलासादायक ठरू शकते. गेल्या काही दिवसांपासून सोन्याच्या दरात सातत्याने घट होत आहे. केवळ नऊ ट्रेडिंग सत्रांमध्ये १० ग्रॅम सोन्याचा भाव अंदाजे १७,६०० रुपयांनी खाली आला आहे. दिवाळीपासून २४ कॅरेट सोन्याचा भाव सुमारे १८,४९० रुपयांनी स्वस्त झाला आहे. त्यामुळे खरेदीदारांना पूर्वीपेक्षा कमी पैसे मोजावे लागत आहेत.
दिवाळीपासून किती घसरण झाली?
दिवाळीच्या वेळी २४ कॅरेट सोन्याचा भाव प्रति १० ग्रॅम सुमारे १,४३,५७० रुपये होता. २१ नोव्हेंबरला तो सुमारे १८,४९० रुपयांनी खाली आला. म्हणजेच दिवाळीपासून १० ग्रॅम २४ कॅरेट सोनं सुमारे १८,४९० रुपयांनी स्वस्त झाले आहे. २२ कॅरेट सोन्याचा भाव दिवाळीत प्रति १० ग्रॅम सुमारे १,३१,६०० रुपये होता, तो आता सुमारे १,१४,६५० रुपयांपर्यंत खाली आला आहे. म्हणजेच २२ कॅरेट सोनंही सुमारे १६,९५० रुपयांनी स्वस्त झाले आहे. सराफा बाजारात ९९.९ टक्के शुद्धतेच्या सोन्याचा भाव एका सत्रात ५,२०० रुपयांनी घसरून प्रति १० ग्रॅम १,२९,३०० रुपये झाला. मागील सत्रात त्याचा भाव १,३४,५०० रुपये होता. सलग नवव्या ट्रेडिंग सत्रात सोन्याच्या दरात घसरण नोंदवली गेली आहे.
वर्षभरातील उच्चांकावरून मोठी घसरण
सोन्याच्या किमतीतील घसरण केवळ दिवाळीपुरती मर्यादित नाही. यावर्षी जानेवारीच्या अखेरीस सोन्याने प्रति १० ग्रॅम सुमारे १.८३ लाख रुपयांचा विक्रमी उच्चांक गाठला होता. आता सराफा बाजारात त्याची किंमत १,२९,३०० रुपयांपर्यंत घसरली आहे. म्हणजेच सोन्याची किंमत विक्रमी उच्चांकावरून अंदाजे ५३,७०० रुपयांनी, म्हणजेच २९.३ टक्क्यांनी खाली आली आहे.
सोन्याचे दर का घसरत आहेत?
आंतरराष्ट्रीय बाजारात सोन्याच्या किमतीतील घसरणीमागे अनेक कारणे आहेत. अमेरिकन डॉलर मजबूत झाला आहे आणि सरकारी रोख्यांवरील परतावा जास्त आहे. शिवाय, अमेरिकेतील वाढत्या व्याजदरांच्या भीतीचाही सोन्याच्या मागणीवर परिणाम झाला आहे. सोन्यावर गुंतवणूकदारांना व्याज मिळत नाही. त्यामुळे जेव्हा गुंतवणूकदारांना रोख्यांसारख्या इतर गुंतवणूक पर्यायांवर चांगल्या परताव्याची अपेक्षा असते, तेव्हा ते सोन्यातून पैसे काढून इतरत्र गुंतवणूक करतात. यामुळे सोन्याच्या किमतींवर दबाव येतो.
आता सोने खरेदी करणे योग्य आहे का?
सोन्याच्या किमतीतील घसरणीमुळे लग्नासाठी दागिने खरेदी करणाऱ्या कुटुंबांना दिलासा मिळू शकतो. भाव घसरल्यामुळे या आठवड्यात खरेदीतही वाढ झाली आहे. मात्र, सोन्याचे भाव इथेच टिकून राहतील की आणखी घसरतील, हे सांगणे कठीण आहे. दागिने खरेदी करण्याचा विचार करत असाल, तर केवळ किमतीवर आधारित निर्णय घेऊ नका. सोनाराकडे घडणावळ शुल्क, जीएसटी आणि हॉलमार्कबद्दल नक्की चौकशी करा.
Leave a Reply