वेलिंग्टनच्या मैदानावर भारतीय गोलंदाजांनी न्यूझीलंडचा अर्धा संघ अवघ्या ७० धावांत माघारी धाडला होता. मात्र, त्यानंतर हेन्री निकोल्सने या मैदानावरील आपला दबदबा कायम राखत विक्रमी शतक झळकावले. हे त्याचे १२वे कसोटी शतक ठरले असून भारताविरुद्धचे त्याचे हे पहिलेच कसोटी शतक आहे.
न्यूझीलंडकडून वेलिंग्टनच्या मैदानावर सर्वाधिक कसोटी शतके झळकावण्याचा विक्रम निकोल्सने आणखी भक्कम केला. ग्लेन फिलिप्सच्या साथीने डाव सावरत त्याने आपल्या १५व्या कसोटी डावात या मैदानावरील पाचवे शतक पूर्ण केले. या यादीत केन विल्यमसनने सेडन पार्कवर २१ डावांत ७ शतके, तर रॉस टेलरने त्याच मैदानावर २४ डावांत ६ शतके झळकावली आहेत. बेसिन रिझर्व्हवर मार्टिन क्रोने १७ डावांत आणि केन विल्यमसनने ३० डावांत प्रत्येकी ५ शतके केली आहेत.
पत्नीच्या वाढदिवशी खास खेळी
निकोल्ससाठी हे शतक वैयक्तिक आयुष्यातही अत्यंत खास ठरले. त्यांची पत्नी ल्युसीच्या वाढदिवशी ही खेळी आली. तिच्यासह संपूर्ण कुटुंब स्टेडियममध्ये उपस्थित होते. दिवसाचा खेळ संपल्यानंतर निकोल्सने आपल्या भावना व्यक्त करताना हा खरोखरच सुंदर अनुभव असल्याचे सांगितले. नॉन-स्ट्रायकर एंडला उभा असतानाही तो वर पाहत होता, जिथे त्याची मुले खेळत होती. पत्नी ल्युसीला वाढदिवसाच्या खास शुभेच्छा देत ती आपली ताकद असल्याचे तो म्हणाला. त्याचे आई-वडीलही स्टेडियममध्ये उपस्थित होते, त्यामुळे हा दिवस त्याच्यासाठी खूप खास ठरला.
चौथ्याच चेंडूवर फलंदाजीला
न्यूझीलंडची सुरुवात अत्यंत खराब झाली होती. त्यामुळे निकोल्सला डावातील चौथ्याच चेंडूवर फलंदाजीसाठी मैदानात उतरावे लागले. फिलिप्ससोबत तगडी भागीदारी करत त्याने भारतीय गोलंदाजांना बॅकफूटवर ढकलले. फिलिप्सने भारतीय गोलंदाजांवर थोडा दबाव निर्माण केल्याने निकोल्सला नैसर्गिक खेळी करणे सोपे झाले. दिवसअखेर दोघेही नाबाद राहिले, ही गोष्ट ड्रेसिंगरूममधील प्रत्येकाचे मनोबल उंचावणारी होती, असेही तो म्हणाला.
Leave a Reply