टेक दिग्गज इलॉन मस्क यांच्या न्यूरालिंक ब्रेन-टेक्नॉलॉजी कंपनीने वैद्यकीय आणि तंत्रज्ञान क्षेत्रात मोठी कामगिरी केली आहे. मेंदूत बसवलेल्या चिपच्या साहाय्याने एका अर्धांगवायूग्रस्त रुग्णाने हातांची कोणतीही हालचाल न करता केवळ विचारांच्या जोरावर GTA 6 म्हणजेच ग्रँड थेफ्ट ऑटो 6 हा गेम खेळला आहे. अर्धांगवायूग्रस्त रुग्णांना डिजिटल स्वातंत्र्य मिळवून देणारे हे मोठे पाऊल मानले जाते.
मेंदूच्या संकेतांचे खेळातील आदेशांत रूपांतर
कंपनीच्या क्लीनिकल ट्रायलमध्ये सहभागी झालेल्या या रुग्णाने कोणताही फिजिकल कंट्रोलर न वापरता, केवळ आपल्या मेंदूच्या संकेतांच्या मदतीने नुकताच लाँच झालेला हा व्हिडिओ गेम खेळून दाखवला आहे. न्यूरालिंकने आपल्या अधिकृत एक्स खात्यावरून या घटनेचा व्हिडिओ शेअर केला आहे. रॉकस्टार गेम्सचा हा बहुप्रतिक्षित गेम १९ नोव्हेंबर रोजी लाँच झाला होता आणि त्यानंतर कंपनीने हा डेमो व्हिडिओ प्रसिद्ध केला.
व्हिडिओमध्ये क्लीनिकल ट्रायलमधील सहभागी कोणत्याही बोटांची हालचाल न करता गेममधील पात्राला चालवणे, वाहने नियंत्रित करणे आणि अवघड मिशन्स पूर्ण करणे यांसारख्या क्रिया करताना दिसत आहे. या सहभागीने आपली ओळख गोपनीय ठेवली आहे. हा व्हिडिओ शेअर करताना मस्क यांनी टेलिपॅथीद्वारे GTA VI खेळताना असे नमूद केले आहे. या खेळामध्ये नेमका कोणता गेमिंग कन्सोल वापरला गेला, याचा अधिकृत तपशील कंपनीने जाहीर केलेला नाही.
न्यूरालिंकने विकसित केलेल्या ब्रेन-कॉम्प्युटर इंटरफेस प्रणालीद्वारे हे शक्य झाले आहे. रुग्णाच्या मेंदूमध्ये अत्यंत सूक्ष्म धागे आणि इलेक्ट्रोड्स असलेली एन-१ चिप शस्त्रक्रियेद्वारे बसवण्यात आली आहे. जेव्हा हा रुग्ण आपल्या हाताची किंवा बोटांची हालचाल करण्याची केवळ कल्पना करतो, तेव्हा मेंदूत निर्माण होणारे विद्युत संकेत ही चिप टिपते. विशेष सॉफ्टवेअर इंटरफेसच्या मदतीने या मेंदूतील लहरींचे रूपांतर रिअल-टाईममध्ये गेमिंग कंट्रोलरच्या कमांडमध्ये केले जाते. रुग्णाने व्हिडिओमध्ये सांगितले की, या चिपमुळे त्याला पुन्हा एकदा कोणाच्याही मदतीशिवाय डिजिटल जगाशी जोडले गेल्याचा आनंद मिळत आहे.
अर्धांगवायूग्रस्तांसाठी नवी आशा
तंत्रज्ञान क्षेत्रातील तज्ज्ञांच्या मते, साधा संगणक कर्सर हलवण्यापेक्षा GTA 6 सारखा वेगवान आणि मल्टी-कंट्रोल गेम खेळणे अत्यंत कठीण असते. तरीही रुग्णाने यावर सहज नियंत्रण मिळवले आहे. दरम्यान, न्यूरालिंकने स्पष्ट केले आहे की हे उपकरण अद्याप प्रायोगिक टप्प्यावर असून त्याला अद्याप अमेरिकेच्या अन्न आणि औषध प्रशासनाची अंतिम व्यावसायिक मंजुरी मिळालेली नाही. असे असले तरी, पाठीच्या कण्याला दुखापत झालेले किंवा अर्धांगवायूग्रस्त रुग्ण स्वतःच्या विचारांनी संगणक, मोबाईल आणि कृत्रिम अवयव वापरू शकतील, या दृष्टीने हे तंत्रज्ञान वैद्यकीय क्षेत्रातील एक ऐतिहासिक पाऊल मानले जात आहे.
Leave a Reply