महाराष्ट्र पोलीस भरतीसाठी वर्षभर तयारी करणाऱ्या तरुणींसाठी दिलासादायक बातमी आहे. शारीरिक चाचणीच्या दिवशी मासिक पाळी आल्यामुळे आता त्यांच्या वर्षभराच्या मेहनतीवर पाणी फिरणार नाही. अशा परिस्थितीत संबंधित तरुणीला काही दिवसांची मुदतवाढ दिली जाणार आहे, अशी घोषणा गृहराज्यमंत्री योगेश कदम यांनी केली आहे.
५ ते ६ दिवसांची मुदतवाढ कशी मिळणार?
पोलीस भरती प्रक्रियेत लेखी परीक्षा आणि शारीरिक चाचणी या दोन्ही गोष्टी महत्त्वाच्या असतात. अनेक वेळा तरुणींना शारीरिक चाचणीच्या दिवशीच मासिक पाळी येते आणि त्यामुळे वर्षभर केलेली मेहनत वाया जाण्याची भीती असते. आता शारीरिक चाचणीच्या दिवशी मासिक पाळी असल्यास मैदानावरील आरोग्य पथकाकडून तपासणी केली जाईल आणि त्यानंतर तरुणीला ५ ते ६ दिवसांची मुदतवाढ दिली जाणार आहे. मुदतवाढीनंतर तिची शारीरिक चाचणी घेतली जाईल.
मासिक पाळीदरम्यान होणारी तीव्र पोटदुखी, कंबरदुखी, थकवा, अशक्तपणा आणि चक्कर यामुळे अनेक तरुणींना धावण्यासह इतर शारीरिक चाचण्यांमध्ये चांगली कामगिरी करता येत नव्हती. तरुणींच्या या नैसर्गिक अडचणीची गंभीर दखल घेत हा निर्णय घेण्यात आला आहे. आरोग्य तपासणीच्या आधारे उमेदवाराची परिस्थिती पाहून तिला जास्त वेळ देण्याबाबतही निर्णय घेतला जाईल. एखाद्या महिला उमेदवाराची परिस्थिती जास्त मुदत देण्याची असल्यास त्याचाही विचार केला जाणार आहे.
उमेदवारांनी काय लक्षात ठेवावे?
ही सुविधा नेमक्या कोणत्या भरती प्रक्रियेला लागू आहे, आरोग्य तपासणी कोण करणार आणि मुदतवाढ मिळवण्यासाठी कोणती कागदपत्रे द्यावी लागतील, याबाबतची सविस्तर अधिकृत माहिती उमेदवारांनी संबंधित भरती प्राधिकरणाकडून तपासून घ्यावी. पोलीस भरतीसाठी अर्ज केलेल्या तरुणींनी शारीरिक चाचणीची तारीख, लागणारी कागदपत्रे आणि आरोग्य तपासणीबाबतचे नियम अधिकृत वेबसाईटवर तपासावेत. या निर्णयामुळे आता तरुणींना मासिक पाळीच्या चिंतेमुळे मैदानावर कमी पडण्याची भीती राहणार नाही.
Leave a Reply