रविवार, २२ नोव्हेंबर २०२६ ▶
वेगवान महाराष्ट्र महाराष्ट्राच्या ताज्या बातम्या

राज्यात तीन महिन्यांपुरताही धान्यसाठा नाही; आंबेडकरांचा दावा

प्रकाश आंबेडकर यांनी नागपूरमध्ये पत्रकार परिषद घेत महायुती सरकारवर निशाणा साधला. राज्य सरकारकडे तीन महिन्यांपुरताही धान्यसाठा नसल्याचा दावा त्यांनी केला आहे.

राज्यात तीन महिन्यांपुरताही धान्यसाठा नाही; आंबेडकरांचा दावा

नागपूरमध्ये पत्रकार परिषद घेत वंचित बहुजन आघाडीचे अध्यक्ष प्रकाश आंबेडकर यांनी महायुती सरकारवर जोरदार टीका केली. दुष्काळाच्या पार्श्वभूमीवर सरकारने शेतकऱ्यांच्या प्रश्नांकडे दुर्लक्ष केल्याचा आरोप त्यांनी केला. शेतकऱ्यांना पाच हजार रुपयांची मदत देऊन त्यांची थट्टा करण्यात आल्याचेही ते म्हणाले.

दुष्काळाच्या काळात महायुतीच्या सर्व मित्रपक्षांनी खेळखंडोबा केल्याचा गंभीर आरोप आंबेडकर यांनी केला. सरकारची मूलभूत भूमिका कोणालाही मदत करू नये अशीच असल्याचा आरोपही त्यांनी केला.

कापसावर हमीभावाने खरेदीची मागणी

कापसाला सरकारने हमीभाव जाहीर केला असला तरी भारतीय कापूस महामंडळाने अद्याप हमीभावाने खरेदी सुरू केलेली नाही, असे आंबेडकर म्हणाले. त्यामुळे महामंडळाने तातडीने हमीभावाने खरेदी सुरू करावी, अशी मागणी त्यांनी केली.

विदर्भ आणि मराठवाडा हे देशातील कापूस उत्पादनाचे प्रमुख केंद्र असून, देशातील ६३ टक्के कापूस या दोन्ही भागांतून येतो, असे त्यांनी सांगितले. ब्राझीलमध्ये यंदा कापसाचे मोठ्या प्रमाणावर उत्पादन झाले आहे. तेथील प्रक्रिया क्षमतेपेक्षा उत्पादन अधिक असल्याने जागतिक बाजारपेठेत कापूस विकण्यासाठी पर्याय शोधण्याची वेळ ब्राझीलवर आली आहे. अशा परिस्थितीत आयात होणाऱ्या कापसावर शुल्क वाढविण्याची गरज असल्याचे आंबेडकर यांनी सांगितले.

३१ ऑक्टोबरपर्यंत आयात होणाऱ्या कापसावर आयात शुल्क लागू करण्यात आले होते. आयात होणाऱ्या कापसावर २० टक्के आयात शुल्क लावावे, अशी मागणी सरकारकडे करण्यात आली आहे. ३१ डिसेंबरपर्यंत आयात शुल्क १७ टक्के होते. त्यात तीन टक्क्यांनी वाढ करून ते २० टक्के करावे, अशी आमची मागणी असल्याचे त्यांनी स्पष्ट केले.

धान्यसाठ्याबाबत मोठा दावा

भाजप आणि राष्ट्रीय स्वयंसेवक संघाचे सरकार हे व्यापाऱ्यांचे सरकार असल्याची टीका करताना, राज्य सरकारकडे तीन महिन्यांपेक्षा अधिक काळ पुरेल इतका अन्नधान्याचा साठा नसल्याचा दावा त्यांनी केला. त्यामुळे भविष्यात अन्नधान्याचे भाव गगनाला भिडण्याची शक्यता असून, व्यापाऱ्यांकडे मात्र मालाचा साठा असल्याचे त्यांनी सांगितले.

दुष्काळग्रस्त परिस्थितीत शासनाला शेतकऱ्यांना थेट मदत करता येत नसेल, तर बाजारपेठेच्या माध्यमातून शेतकऱ्यांना मदत करावी, असे आंबेडकर म्हणाले. कापड प्रक्रियेवर नियंत्रण ठेवून तयार कपड्यांच्या विक्रीवरही नियंत्रण आणले पाहिजे. त्यामुळे बाजारातील दर नियंत्रणात राहण्यास मदत होईल, असे त्यांनी सांगितले.

यावेळी लक्ष्यकेंद्रित आंदोलन केले जाईल आणि या आंदोलनाची सुरुवात नागपूरमधून करण्यात येईल, असा इशाराही त्यांनी दिला. शासनाने परिस्थितीचे गांभीर्य लक्षात घेऊन तातडीने उपाययोजना कराव्यात, असे आवाहन त्यांनी केले. दरम्यान, इंदू मिलच्या संदर्भातील प्रश्नावर प्रकाश आंबेडकर यांनी भाष्य करणे टाळले.

समृद्धी जगताप

Similar Posts

View All

Leave a Reply

Your email address will not be published. Required fields are marked *

ही वेबसाइट AI सहाय्याने व्यवस्थापित केली जाते · This website is managed with AI assistance