नाशिकमधील नामांकित हॉटेल्समध्ये मिळणाऱ्या अन्नाच्या गुणवत्तेबाबत गंभीर प्रश्न निर्माण झाले आहेत. अन्न सुरक्षा नियमांचे उल्लंघन होत असल्याच्या आणि अस्वच्छतेच्या तक्रारी आल्यानंतर अन्न व औषध प्रशासनाने शहरातील पाच हॉटेल्सची तपासणी केली. या तपासणीत हॉटेल्समध्ये अस्वच्छता, किटकांचा प्रादुर्भाव, अन्न साठवणुकीतील त्रुटी आणि मुदतबाह्य अन्नपदार्थ आढळून आले.
पाच हॉटेल्समध्ये काय आढळले
गंगापूर रोडवरील जुन्या गंगापूर नाक्याजवळ असलेल्या हॉटेल विहारमध्ये अन्न तयार करण्याच्या ठिकाणी अस्वच्छता आणि किटकांचा प्रादुर्भाव आढळला. सातपूर एमआयडीसी परिसरातील हॉटेल शामसुंदरमध्येही अस्वच्छ परिस्थिती आणि अन्न साठवणुकीबाबत त्रुटी निदर्शनास आल्या.
कॉलेज रोडवरील क्यूबवर्ल्ड बिझनेस सेंटरमधील दुर्गा कॅफेमध्ये अन्न सुरक्षा नियमांचे उल्लंघन आढळले. ग्राहकांना दिल्या जाणाऱ्या बिलांवर एफएसएसएआय परवाना क्रमांक नमूद नव्हता. तसेच मेन्यू कार्ड किंवा डिस्प्लेवर स्वयंपाकासाठी वापरण्यात येणाऱ्या माध्यमाचा उल्लेखही नव्हता. त्यामुळे या कॅफेचे नोंदणी प्रमाणपत्र निलंबित करण्यात आले.
कॉलेज रोडवरील हॉटेल तुषार मिसळमध्ये अन्न साठवणुकीसाठी अपुरी जागा आणि मुदतबाह्य अन्नपदार्थ आढळले. तर पंचवटीतील मुंबई-आग्रा रोडवरील आडगाव फाटा परिसरातील हॉटेल महाराजा काठियावाडीच्या स्टोअर रूममध्ये उंदरांची विष्ठा आढळली. तसेच मुदतबाह्य अन्नपदार्थ साठवून ठेवल्याचे आणि धूळ व किटकांचा प्रवेश रोखण्यासाठी योग्य व्यवस्था नसल्याचे तपासणीत समोर आले.
व्यावसायिकांमध्ये खळबळ, पुढील कारवाईची शक्यता
या कारवाईमुळे शहरातील हॉटेल व्यावसायिकांमध्ये खळबळ उडाली आहे. हॉटेलमध्ये चव आणि लोकप्रियतेसोबतच स्वच्छता, अन्न साठवणूक आणि सुरक्षिततेच्या नियमांचे पालन करणेही तितकेच महत्त्वाचे आहे. त्यामुळे अन्न सुरक्षा नियमांचे उल्लंघन करणाऱ्या आस्थापनांवर प्रशासनाकडून पुढील काळातही कारवाई केली जाण्याची शक्यता आहे.
Leave a Reply