युक्रेन आणि रशियामध्ये युद्ध सुरूच आहे. रशियाकडून युक्रेनवर भीषण क्षेपणास्त्र हल्ला करण्यात आला आहे. या हल्ल्यामध्ये दोन जणांचा मृत्यू झाला असून साठपेक्षा अधिक नागरिक जखमी झाले आहेत. रशियाकडून शनिवारी युक्रेनची राजधानी कीववर हा हल्ला करण्यात आला. युक्रेनचे राष्ट्रपती झेलेंस्की यांचे निवासस्थान देखील कीवमध्येच आहे. त्यामुळे त्यांचे निवासस्थान असलेल्या शहरालाच आता निशाणा बनवण्यात आले आहे. त्यामुळे हे युद्ध आणखी भडकण्याची शक्यता आहे.
जीवित आणि आर्थिक हानी
या हल्ल्यामध्ये युक्रेनची प्रचंड जीवित आणि आर्थिक हानी झाली आहे. या हल्ल्यामध्ये एका सात वर्षांच्या मुलाचा आणि एका वीस वर्षांच्या महिलेचा मृत्यू झाला आहे. तसेच साठ नागरिक जखमी झाले असून जखमींमध्ये सहा लहान मुलांचा समावेश आहे. या क्षेपणास्त्र हल्ल्यांमध्ये २५ पेक्षा अधिक इमारती उद्ध्वस्त झाल्या आहेत. यामध्ये हॉस्पिटल, शाळा आणि काही रहिवासी इमारतींचा देखील समावेश आहे. या हल्ल्यांमध्ये अनेक वाहनांचेही मोठे नुकसान झाले आहे. दरम्यान समोर आलेल्या माहितीनुसार रशियाकडून युक्रेनच्या एका रेल्वे स्थानकावर देखील हल्ला करण्यात आला आहे.
झेलेंस्की यांची प्रतिक्रिया आणि मदतीची मागणी
युक्रेनकडून या हल्ल्याचा निषेध करण्यात आला आहे. रशिया जाणून बुजून आपल्या नागरी भागांना निशाणा बनवत असल्याचे युक्रेनच्या राष्ट्रपतींनी म्हटले आहे. रशियाने केलेल्या या क्षेपणास्त्र हल्ल्यानंतर घटनास्थळी बचाव कार्य सुरू आहे. रशियाने मुद्दाम आमच्या नागरी वस्त्यांमध्ये हल्ला केला आहे. या ठिकाणी आमचे कोणतेही सैन्यतळ नव्हते. या हल्ल्यामध्ये आमचे प्रचंड नुकसान झाले आहे, असेही झेलेंस्की यांनी म्हटले आहे. तसेच त्यांनी या घटनेत मृत्यू झालेल्या नागरिकांना श्रद्धांजली अर्पण केली आहे. या हल्ल्यानंतर युक्रेनच्या राष्ट्रपतींनी पुन्हा एकदा जगाकडे मदतीची मागणी केली आहे. अशा परिस्थितीत जगाने शांत बसू नये, असे झेलेंस्की यांनी म्हटले आहे.
Leave a Reply