ताजमहाल ही अशी वास्तू आहे, जिला पाहून अनेकजण आश्चर्यचकित होतात. तिची भव्यता आणि उभारणीसाठी वापरण्यात आलेला पांढरा संगमरवर याबाबत आजही लाखो लोकांना उत्सुकता आहे. दरम्यान, हीच वास्तू आजच्या काळात पुन्हा बांधायची असेल तर किती रुपये लागतील, याचा अंदाज काही अहवालांतून समोर आला आहे.
१६ ते १७ वर्षांत उभी राहिली वास्तू
ताजमहालच्या अधिकृत संकेतस्थळानुसार या वास्तूची उभारणी १६३१-३२ मध्ये सुरू झाली आणि १६४८ साली ती पूर्ण झाली. पांढऱ्या संगमरवरापासून तयार केलेल्या या वास्तूच्या निर्मितीसाठी साधारण १६ ते १७ वर्षे लागली. या कामात साधारण २० ते २२ हजार कामगार आणि कारागीर गुंतले होते. त्यात गवंडी, दगड कापणारे, नक्षीकाम करणारे आणि चित्रकार यांचा समावेश होता.
आजच्या खर्चाचा अंदाज किती?
आजच्या घडीला ताजमहालची निर्मिती करायची असेल तर नेमका किती खर्च येईल, याची निश्चित आकडेवारी उपलब्ध नाही. मात्र काही अहवालांनुसार आजच्या महागाईचा अंदाज लक्षात घेता ताजमहालमधील मुख्य मकबऱ्याची निर्मिती करायची असेल तर त्यासाठी ५२८० कोटी रुपये लागू शकतात. आणखी एका अंदाजानुसार ताजमहालच्या पूर्ण परिसराची निर्मिती करायची असेल तर त्यासाठी साधारण ७००० ते ८००० कोटी रुपये लागू शकतात.
ताजमहाल पाहण्यासाठी दरवर्षी लाखो लोक आग्र्याला जातात. तिकीट विक्रीतून २०२४-२५ साली ९९.७७ कोटी रुपयांची कमाई झाली, तर २०२३-२४ साली हा आकडा ९८.५५ कोटी रुपये होता.
Leave a Reply