दोहा येथे सुरू असलेल्या एसीसी पुरुष आशिया चषक रायझिंग स्टार्स स्पर्धेतील पहिल्या सामन्यात भारत ‘ए’ संघाने नेपाळसमोर मोठे आव्हान उभे केले. कर्णधार तिलक वर्मा यांच्या १०७ धावा आणि यष्टीरक्षक कुमार कुशाग्र यांच्या ११७ धावांच्या जोरावर भारताने ५० षटकांत ९ बाद ३३२ धावा केल्या होत्या.
नेपाळच्या गोलंदाजीने पहिल्या डावात चांगली कामगिरी केली होती, त्यामुळे फलंदाजीतही ते काही चांगले खेळतील असे वाटत होते. मात्र, हर्षित राणा आणि प्रिन्स यादव यांनी नेपाळच्या फलंदाजांना खेळपट्टीवर स्थिरावूच दिले नाही.
सामन्यात काय घडलं?
मुख्य प्रशिक्षक गौतम गंभीर यांचा लाडका क्रिकेटपटू म्हणून ओळख असलेल्या हर्षित राणाने १६ धावा देत ४ विकेट घेतल्या आणि भारताच्या मुख्य संघातील प्रवेशाच्या दिशेने आगेकूच केली. राणाने सुरुवातीचा स्पेल सावरला आणि तिसऱ्याच चेंडूवर अर्जुन कुमल यांना खातेही उघडू दिले नाही. दुसऱ्या बाजूने प्रिन्स यादवही एकामागोमाग एक विकेट घेत होता. या दोघांच्या गोलंदाजीपुढे नेपाळचा संघ पूर्णपणे बेचिराख झाला.
दुखापतींशी झुंज आणि आंतरराष्ट्रीय कारकीर्द
२४ वर्षीय हर्षित राणाला गेल्या काही काळात वारंवार दुखापतींचा सामना करावा लागला आहे. या वर्षाच्या सुरुवातीला टी-२० विश्वचषकाच्या सराव सामन्यात तो जखमी झाला होता, त्यामुळे त्याला विश्वचषक स्पर्धेत खेळता आले नाही. आयपीएल २०२६ मध्येही त्याला सहभागी होता आले नव्हते. आयपीएलनंतर त्याने आयर्लंड आणि इंग्लंड दौऱ्यांवर पाच सामने खेळले, मात्र इंग्लंडविरुद्धच्या सामन्यात त्याला हॅमस्ट्रिंगची दुखापत झाली आणि जुलैपासून तो मैदानाबाहेर आहे.
गेल्या महिन्यात अफगाणिस्तानविरुद्धच्या टी-२० मालिकेसाठी त्याची निवड करण्यात आली होती आणि आशियाई खेळांसाठीच्या भारतीय संघातही त्याचा समावेश करण्यात आला होता. मात्र, पुनर्वसनादरम्यान त्याला पुन्हा दुखापत झाली. ७ सप्टेंबर रोजी सराव सामन्यात गोलंदाजी करताना त्याच्या मांडीच्या स्नायूंवर ताण आला, त्यामुळे त्याच्या पुनरागमनाबाबत प्रश्नचिन्ह निर्माण झाले होते.
हर्षित राणाने आतापर्यंत भारतासाठी दोन कसोटी सामन्यांमध्ये चार विकेट घेतल्या आहेत. एकदिवसीय क्रिकेटमध्ये १५ सामन्यांत त्याच्या नावावर ३० विकेट आहेत, तर १४ टी-२० आंतरराष्ट्रीय सामन्यांमध्ये त्याने १६ विकेट घेतल्या आहेत. त्याला न्यूझीलंड दौऱ्यावर न पाठवता रायझिंग स्टार आशिया चषकात खेळवण्याचा संघ व्यवस्थापनाने निर्णय घेतला होता आणि पहिल्याच सामन्यात त्याने १६ धावांत ४ विकेट घेत तो निर्णय योग्य ठरवला. वेगवान गोलंदाजीसोबत खालच्या फळीत उपयुक्त फलंदाजी करण्याची क्षमता असलेल्या राणाला आठव्या क्रमांकावर फलंदाजी करू शकणारा अष्टपैलू खेळाडू म्हणून एकदिवसीय आणि कसोटी या दोन्ही प्रकारांत संधी देण्याचा विचार सुरू असल्याचे सांगितले जाते.
Leave a Reply