राज्याचे दिवंगत उपमुख्यमंत्री अजित पवार यांच्या निधनानंतर त्यांच्या अपघाताच्या परिस्थितीबाबत आणि शेवटच्या दिवसातील घडामोडींबाबत पारदर्शक माहिती मिळावी, अशी मागणी होत आहे. या पार्श्वभूमीवर अभिनेते किरण माने यांनी सोशल मीडियावर एक पोस्ट लिहून सरकारला अनेक प्रश्न विचारले आहेत. त्यांची ही पोस्ट सध्या चर्चेत आहे.
सीसीटीव्ही फुटेज सार्वजनिक करण्याची मागणी
किरण माने यांनी आपल्या पोस्टमध्ये म्हटले आहे की, त्यांचे मित्र आणि अजित पवार यांचे निष्ठावान कार्यकर्ते असलेले ॲड. नितीन यादव यांनी माहिती अधिकारांतर्गत अजित पवार यांच्या शेवटच्या दिवसाचे सीसीटीव्ही फुटेज मागितले होते. देवगिरी बंगला ते मुंबई विमानतळ आणि विमानतळावरील फुटेज मागवण्यात आले होते. मात्र ते देण्यास नकार देण्यात आल्याचा दावा माने यांनी केला आहे. उपमुख्यमंत्र्यांचा मृत्यू हा सार्वजनिक हिताचा विषय नसेल, तर सार्वजनिक हिताचा विषय नेमका कोणता, असा सवाल त्यांनी केला आहे.
सरकारी बंगला, सरकारी गाडी, सरकारी सुरक्षा आणि सरकारी दौरा यात खाजगी नेमके काय आहे, असा प्रश्नही त्यांनी उपस्थित केला. ज्यांच्या खाजगीपणाचे कारण दिले जाते, ते आज हयात नाहीत, मग नेमका कोणाचा खाजगीपणा जपला जात आहे, असे त्यांनी म्हटले आहे. फुटेज अस्तित्वात असल्याचे मान्य केले जाते आणि ते पोलिसांना दिल्याचेही सांगितले जाते, तर ते सर्वसामान्य जनतेला दाखवण्यास अडचण काय, असा प्रश्न त्यांनी विचारला आहे. सत्य स्वच्छ असेल, तर ते लपवण्याची गरज का पडते, असाही सवाल त्यांनी केला आहे.
इतर प्रकरणांचा दाखला देत गुप्ततेवर प्रश्न
आपल्या पोस्टमध्ये माने यांनी संतोष देशमुख हत्या प्रकरण आणि खरात प्रकरणाचाही उल्लेख केला. संतोष देशमुख प्रकरणातील फोटो आणि व्हिडिओ सार्वजनिक झाले होते, तर खरात प्रकरणातील सीसीटीव्ही फुटेजही लोकांसमोर आले होते, असा दाखला त्यांनी दिला. मग अजित पवार यांच्या प्रकरणातच एवढी गुप्तता का ठेवली जात आहे, असा सवाल त्यांनी केला. यामागे कोणाला वाचवण्याचा प्रयत्न केला जात आहे का, असा प्रश्नही त्यांनी उपस्थित केला. पोस्टच्या शेवटी त्यांनी लोकशाहीचा संदर्भ देत म्हटले की, आम्ही आरोप करत नाही, आम्ही फक्त प्रश्न विचारतो आणि प्रश्नांना उत्तर देणे ही लोकशाहीत सरकारची जबाबदारी आहे. नुकत्याच झालेल्या ‘लोकतंत्र बचाव’ आंदोलनाचाही त्यांनी उल्लेख केला.
Leave a Reply