भाजीपाल्यांचे दर सध्या चांगलेच वाढले आहेत. कालपरवापर्यंत ५ ते ६ रुपयांना मिळणारे लिंबू आता १० ते १२ रुपयांना विकले जात आहेत. म्हणजेच लिंबांच्या किमती जवळपास दुप्पट झाल्या आहेत. त्यामुळे अनेकजण पैसे वाचवण्यासाठी एकाच वेळी घाऊक स्वरूपात लिंबं खरेदी करतात.
मात्र, भरपूर लिंबं घरी आणल्यानंतर ती जास्त काळ टिकवणं हे मोठं आव्हान असतं. काही दिवसांतच लिंबं सुकू लागतात आणि त्यातील रसही कमी होतो. अगदी फ्रीजमध्ये ठेवली तरी ती दीर्घकाळ ताजी राहत नाहीत. अशा वेळी एका व्हायरल व्हिडीओमध्ये सांगितलेली सोपी ट्रिक उपयोगी पडू शकते. या ट्रिकचा वापर करून लिंबं जवळपास ६ महिने टिकवता येऊ शकतात, असा दावा व्हिडीओमध्ये करण्यात आला आहे.
लिंबं टिकवण्यासाठी काय करावे
हा व्हिडीओ एका इन्स्टाग्राम अकाउंटवरून शेअर करण्यात आला आहे. त्यात सांगितल्याप्रमाणे, सर्वप्रथम बाजारातून आणलेली ताजी लिंबं स्वच्छ कापडाने व्यवस्थित पुसून घ्या. त्यानंतर प्रत्येक लिंबावर तेलाचा हलका स्प्रे करा. लिंबाच्या सर्व बाजूंना तेल व्यवस्थित लागल्याची खात्री करा. पुढे ही लिंबं एका सुती कपड्यात गुंडाळून हवाबंद डब्यात ठेवा. अशा पद्धतीने साठवणूक केल्यास लिंबं जवळपास ६ महिने ताजी राहू शकतात, असा दावा व्हिडीओमध्ये करण्यात आला आहे.
ही ट्रिक काम कशी करते
साधारणपणे लिंबातील पाण्याचे बाष्पीभवन झाल्यामुळे ते हळूहळू सुकू लागतात. मात्र, लिंबाच्या सालीवर तेलाचा पातळ थर लावल्यास बाष्पीभवनाचा वेग कमी होण्यास मदत होते. त्यामुळे लिंबांमधील ओलावा टिकून राहतो. तसेच, हवाबंद डब्यात ठेवल्यामुळे बाहेरील हवेचा थेट संपर्क कमी होतो. परिणामी, लिंबं लवकर सुकत नाहीत आणि त्यांचा टिकण्याचा कालावधी वाढण्यास मदत होते.
नेटकऱ्यांच्या प्रतिक्रिया
हा व्हिडीओ आतापर्यंत ३ हजारांहून अधिक वेळा पाहिला गेला आहे. शेकडो नेटकऱ्यांनी त्यावर प्रतिक्रिया दिल्या आहेत. एका वापरकर्त्याच्या मते ही ट्रिक खूपच चांगली आहे. तर आणखी एकाला कोणते तेल वापरायचे, असा प्रश्न पडला आहे. यावर कोणतेही तेल वापरू शकता, असे उत्तर व्हिडीओमधील महिलेने दिले आहे. एका वापरकर्त्याने मात्र या ट्रिकची फिरकी घेत मध किंवा दह्याचा वापर केला तर लिंबं तीन वर्षे टिकतील, अशी उपरोधिक प्रतिक्रिया दिली आहे. तर काही नेटकऱ्यांनी या ट्रिकवर फारसा विश्वास नसल्याचेही म्हटले आहे.
Leave a Reply