बारामतीमध्ये यंदा मॅरेथॉनचा मोठा उत्सव रंगणार आहे. इंडियाज् आयकॉनिक बारामती पॉवर मॅरेथॉन २०२६ चे चौथे पर्व २७ ते २९ नोव्हेंबरदरम्यान तीन दिवसांच्या क्रीडा महोत्सवाच्या स्वरूपात आयोजित करण्यात आले आहे. या महोत्सवात तब्बल ७,२७० धावपटू सहभागी होणार आहेत. हे पर्व स्व. अजितदादा पवार यांच्या स्मृतींना समर्पित करण्यात आले आहे.
अजितदादांच्या मार्गदर्शनातून आणि भक्कम पाठिंब्यातून ही मॅरेथॉन सुरू झाली होती. त्यांच्या कार्याचा गौरव करणे, आरोग्यदायी जीवनशैली आणि फिटनेसची संस्कृती रुजवणे, ही यंदाच्या आयोजनाची प्रमुख संकल्पना आहे. बारामती स्पोर्ट्स फाउंडेशनच्या वतीने या मॅरेथॉनचे आयोजन करण्यात आले आहे.
तीन दिवसीय महोत्सव आणि स्पोर्ट्स एक्स्पो
महोत्सवाचा प्रारंभ शुक्रवार, २७ नोव्हेंबर रोजी सकाळी १० वाजता होणार आहे. ज्येष्ठ नेते शरद पवार यांच्या हस्ते स्पोर्ट्स एक्स्पो आणि बिब वितरणाचे उद्घाटन होईल. या एक्स्पोमध्ये विविध आंतरराष्ट्रीय क्रीडा ब्रँड्सचे ३० स्टॉल्स उभारण्यात येणार आहेत. तिथे क्रीडा साहित्य पाहण्याबरोबरच खरेदीची संधीही उपलब्ध असेल.
२७ आणि २८ नोव्हेंबर रोजी सकाळी १० ते सायंकाळी ६ वाजेपर्यंत एक्स्पो आणि बिब वितरण सुरू राहणार आहे. धावपटूंना स्पर्धेचे बिब आणि किट देण्यात येणार आहेत. याशिवाय विविध खेळ, जादूचे प्रयोग, खाद्यपदार्थांचे स्टॉल्स आणि मनोरंजनाचे कार्यक्रमही होणार आहेत, त्यामुळे हा महोत्सव संपूर्ण कुटुंबासाठी आकर्षण ठरणार आहे.
चार अंतरांच्या स्पर्धा आणि १० लाखांची पारितोषिके
मुख्य मॅरेथॉन स्पर्धा रविवार, २९ नोव्हेंबर रोजी बारामतीतील रेल्वे स्टेशन ग्राउंड येथून सुरू होणार आहे. उपमुख्यमंत्री सुनेत्रा पवार यांच्या प्रमुख उपस्थितीत स्पर्धेचा शुभारंभ होईल. धावपटूंसाठी चार प्रकारांत स्पर्धा आयोजित करण्यात आली आहे. ४२ किलोमीटरची फुल मॅरेथॉन पहाटे ४ वाजता, २१ किलोमीटरची हाफ मॅरेथॉन सकाळी ६ वाजता, १० किलोमीटरची धाव सकाळी ६.३० वाजता आणि ५ किलोमीटरची फन रन सकाळी ७.५५ वाजता सुरू होईल.
यंदाच्या मॅरेथॉनमध्ये एकूण १० लाख रुपयांची पारितोषिके ठेवण्यात आली आहेत. चारही प्रकारांमध्ये विविध वयोगटांनुसार पारितोषिके दिली जाणार असून, प्रत्येक गटातील प्रथम तीन धावपटूंचा गौरव करण्यात येणार आहे. मोठ्या संख्येने धावपटू सहभागी करून घेणाऱ्या शाळा, महाविद्यालये आणि रनिंग ग्रुप्सनाही विशेष ट्रॉफी देऊन सन्मानित केले जाणार आहे.
या मॅरेथॉनचा मार्ग वर्ल्ड अॅथलेटिक्सच्या निकषांनुसार प्रमाणित आणि मोजलेला आहे. एआयएमएसच्या सहकार्यामुळे या स्पर्धेला आंतरराष्ट्रीय स्तरावर विशेष महत्त्व मिळाले आहे. धावपटूंच्या सुरक्षिततेसाठी मार्गावर हायड्रेशन सपोर्ट, वैद्यकीय सुविधा, आपत्कालीन मदत आणि स्वयंसेवकांची फळी सज्ज राहणार आहे. धावपटूंना दर्जेदार टी-शर्ट, आकर्षक फिनिशर मेडल्स आणि पौष्टिक नाश्त्याची सुविधा देण्यात येणार आहे.
२०२३ मध्ये अवघ्या ७२७ धावपटूंच्या सहभागाने सुरू झालेल्या या मॅरेथॉनमध्ये यंदा ७,२७० धावपटूंनी नोंदणी केली आहे. चार वर्षांत धावपटूंच्या संख्येत झालेली दहापट वाढ बारामतीच्या क्रीडा क्षेत्रातील वाढत्या लोकप्रियतेचे द्योतक आहे. या मॅरेथॉनमुळे शहरात फिटनेस संस्कृती रुजत असून, पर्यटन, आदरातिथ्य आणि स्थानिक व्यवसायालाही चालना मिळणार आहे.
Leave a Reply