नाशिक जिल्ह्यातील अग्रगण्य व्यापारी बँक म्हणून गणल्या जाणाऱ्या पिंपळगाव मर्चंट्स बँकेच्या अध्यक्षपदी करसनदास मुळजी ठक्कर यांची बिनविरोध निवड झाली आहे. उपाध्यक्षपदी नंदकिशोर जंगम, तर मानद कार्यकारी संचालकपदी महेश चांदवडकर यांचीही बिनविरोध निवड झाली आहे. मंगळवारी, १८ नोव्हेंबर रोजी ही निवड जाहीर करण्यात आली.
सलग पंचवीस वर्षांपासून पिंमकोचे संचालक असलेले करसन ठक्कर यांना तिसऱ्यांदा अध्यक्षपद भूषवण्याची संधी मिळाली आहे. ठक्कर, जंगम आणि चांदवडकर यांच्या रूपाने अनुभव आणि नवखेपणाचा संगम घालण्याचा प्रयत्न करण्यात आल्याचे सांगण्यात आले.
आवर्तन पद्धतीने राजीनामा, मग विशेष सभा
पिंमकोचे अध्यक्ष विजयराज बाफणा आणि उपाध्यक्ष संदीप सुराणा यांनी आवर्तन पद्धतीनुसार राजीनामा दिला होता. त्यामुळे पदाधिकारी निवडीसाठी संचालक मंडळाची विशेष सभा झाली. या सभेत अध्यक्षपदासाठी करसन ठक्कर, उपाध्यक्षपदासाठी नंदकिशोर जंगम आणि मानद कार्यकारी संचालकपदासाठी महेश चांदवडकर यांचे प्रत्येकी एक अर्ज आले. तिन्ही पदांसाठी प्रत्येकी एकच अर्ज आल्याने सहाय्यक निबंधक कांतीलाल गायकवाड यांनी बिनविरोध निवडीची घोषणा केली.
वर्षभरावर निवडणूक असताना संचालक मंडळाने ठक्कर यांच्याकडे अध्यक्षपदाची धुरा दिली आहे. चांदवडकर यांना गेल्या चार वर्षांत दोनदा उपाध्यक्षपदाची संधी मिळाली होती; आता त्यांना पुन्हा मानद कार्यकारी संचालकपदावर वर्णी लागली आहे. नवनिर्वाचित पदाधिकाऱ्यांचा उपस्थितांनी सत्कार केला. यावेळी ज्येष्ठ संचालक अशोक शाह, विजयराज बाफणा, हिरालाल पगारिया, धनंजय गांगुर्डे, मनोहर पाटोळे, कालिदास खैरे, सुनंदा जैन, विद्या घोडके, हसमुख शाह, वर्धमान बुरड, कांतीलाल पटेल, डॉ. महेश बुब, प्रकाश गोसावी, संदीप सुराणा, डॉ. अभिनंद भंडारी, दिलीप सोमठाणकर, रोहीत मुथा आणि मुख्य कार्यकारी अधिकारी भोजराज जैन उपस्थित होते.
बँकेच्या प्रगतीसाठी प्रयत्न करणार
पिंमकोच्या प्रगतीचा आलेख उंचावत ठेवण्यासाठी प्रयत्न करणार असल्याचे नवनिर्वाचित अध्यक्ष करसनदास ठक्कर यांनी सांगितले. सर्वांना सोबत घेऊन संचालक मंडळाचा विश्वास सार्थ ठरवणार असून सभासदांना अधिक सुलभ सेवा देण्यासाठी योजना राबवणार असल्याचेही त्यांनी सांगितले.
Leave a Reply