एकीकडे देशात थंडीची चाहूल लागली असतानाच दुसरीकडे हवामानात पुन्हा एकदा मोठा बदल होण्याची शक्यता आहे. भारतीय हवामान विभागाने १८ नोव्हेंबर रोजी देशातील १० राज्यांना मुसळधार पावसाचा इशारा दिला आहे. पावसासोबतच जोरदार वादळी वारे वाहण्याचाही अंदाज वर्तवण्यात आला आहे. हवामान विभागाने दिलेल्या माहितीनुसार, पुढील सात तास महत्त्वाचे असणार आहेत. या काळात काही भागांमध्ये मुसळधार पाऊस पडू शकतो.
## कोणत्या राज्यांना इशारा
हवामान विभागाच्या अंदाजानुसार, आंध्र प्रदेश, कर्नाटक, छत्तीसगड, तमिळनाडू, ओडिशा, झारखंड, पश्चिम बंगाल, तेलंगणा, बिहार आणि अंदमान-निकोबार या दहा राज्यांमध्ये पावसाचा जोर वाढू शकतो. या राज्यांमधील काही ठिकाणी मुसळधार पाऊस आणि वादळी वाऱ्यांचा सामना करावा लागू शकतो. काही भागांमध्ये ताशी ८० ते १०० किलोमीटर वेगाने वारे वाहण्याची शक्यता व्यक्त करण्यात आली आहे. त्यामुळे संबंधित राज्यांतील नागरिकांनी सतर्क राहण्याचे आवाहन करण्यात आले आहे.
## महाराष्ट्रातील हवामान
राज्यातील हवामानात सध्या बदल जाणवत असून, पश्चिम महाराष्ट्रात थंडीचा प्रभाव वाढू लागला आहे. दिवसा उन्हाचा चटका, तर रात्री आणि पहाटे थंड वारे वाहत असल्याने नागरिकांना बदलत्या वातावरणाचा सामना करावा लागत आहे. पुणे, सातारा, सांगली, कोल्हापूर आणि सोलापूर जिल्ह्यांमध्ये कमाल तापमान २८, तर किमान तापमान १७ अंश सेल्सिअस राहण्याचा अंदाज आहे. हवामानातील या बदलामुळे नागरिकांनी आरोग्याची काळजी घ्यावी, असा सल्ला दिला जात आहे.
Leave a Reply