मुंबईच्या भेंडी बाजार परिसरातील पाकमोडिया लेनमध्ये असलेली एक जुनी आणि धोकादायक इमारत पाडण्याची तयारी महापालिकेने पूर्ण केली आहे. ही इमारत अंडरवर्ल्ड डॉन दाऊद इब्राहिमचे वडिलोपार्जित घर म्हणून ओळखली जाते. हाजी इस्माईल हबीब मुसाफिरखाना नावाच्या या इमारतीवर आजपासून बुलडोझर चालवला जाणार आहे. १८ आणि १९ नोव्हेंबर या दोन दिवसांत ही कारवाई पूर्ण करण्याचे नियोजन करण्यात आले आहे.
ही इमारत ८० वर्षांहून अधिक जुनी असून तिची अवस्था अत्यंत जीर्ण झाली आहे. भिंती आणि छत कोसळण्याचा धोका निर्माण झाला असून परिसरातील रहिवासी आणि व्यापारी याबाबत वारंवार तक्रारी करत होते. महापालिकेच्या पाहणीतही ही इमारत धोकादायक असल्याचे स्पष्ट झाले होते. त्यामुळे सुरक्षेच्या कारणास्तव ती पाडण्याचा निर्णय घेण्यात आला.
न्यायालयाच्या आदेशानुसार कारवाई
या इमारतीबाबत उच्च न्यायालयात याचिका दाखल झाल्या होत्या. न्यायालयाने महापालिकेला आवश्यक कारवाई करण्याचे स्पष्ट निर्देश दिले होते. त्यानुसार महापालिकेच्या ‘सी’ वॉर्डने १६ नोव्हेंबर २०२६ रोजी नोटीस जारी करून ही इमारत ‘सी-१’ श्रेणीतील अत्यंत जीर्ण आणि धोकादायक इमारत असल्याचे घोषित केले. मुंबई उच्च न्यायालयाच्या ३१ ऑगस्ट २०२० च्या आदेशानुसार ही कारवाई मोठ्या पोलीस बंदोबस्तात केली जाणार आहे. तोडकामासाठी बुलडोझर आणि इतर यंत्रसामग्री वापरण्यात येणार असून परिसरात सुरक्षा व्यवस्था बळकट करण्यात आली आहे. पोलीस आणि महापालिका कर्मचारी कारवाईच्या ठिकाणी तैनात राहणार आहेत.
याच इमारतीत राहत होते दाऊदचे कुटुंब
१९८६ मध्ये भारतातून पलायन करण्यापूर्वी दाऊद इब्राहिम आणि त्याचे कुटुंब याच इमारतीत राहत होते. या इमारतीत त्याचे घर आणि कार्यालय होते. याच ठिकाणी १९९३ च्या मुंबई बॉम्बस्फोटांचा कट रचण्यात आला होता, असे सांगितले जाते. त्यामुळे या इमारतीला केवळ जुन्या वास्तूचे महत्त्व नसून तिचा एक गंभीर ऐतिहासिक संदर्भही आहे.
वर्षानुवर्षे ही इमारत वादात राहिली आहे. आता न्यायालयाच्या आदेशानंतर आणि महापालिकेच्या नोटिशीनंतर तिचे तोडकाम होत असल्याने भेंडी बाजार परिसरातील रहिवाशांना दिलासा मिळणार आहे. धोकादायक इमारत पाडल्यानंतर परिसरातील सुरक्षेचा प्रश्न सुटणार असल्याचे स्थानिकांचे म्हणणे आहे.
Leave a Reply