जळगावातील ईस्ट खान्देश एज्युकेशन सोसायटीच्या अध्यक्षपदी अभिषेक अविनाश लाठी यांची निवड करण्यात आली. संस्थेच्या विशेष सर्वसाधारण सभेत ही निवड जाहीर झाली. संस्थेचे सचिव मुकुंद लाठी तसेच अन्य ज्येष्ठ सदस्यांच्या मार्गदर्शनाखाली नव्या कल्पना राबवून संस्थेचे नाव अधिक उज्ज्वल करणार असल्याचा मनोदय नवनियुक्त अध्यक्ष अभिषेक लाठी यांनी बोलून दाखवला.
रिक्त पदासाठी विशेष सभा
ईस्ट खान्देश एज्युकेशन सोसायटीचे अध्यक्ष अरविंद लाठी यांचे १९ जुलै रोजी निधन झाल्याने उर्वरित कालावधीसाठी रिक्त पदावरील नियुक्तीसाठी संस्थेची विशेष सर्वसाधारण सभा बोलावण्यात आली होती. या सभेत सर्व सदस्यांत चर्चा होऊन ही नियुक्ती करण्यात आली. २००२ पासून अरविंद लाठी हे या संस्थेचे अध्यक्ष होते. याच काळापासून संस्थेच्या सचिवपदी मुकुंद लाठी हे कार्यरत आहेत. अरविंद लाठी यांच्यासह संस्थेच्या उभारणीत मुकुंद लाठी यांचे मोठे योगदान राहिले आहे.
शिक्षण आणि क्रीडा क्षेत्रातील योजना
नूतन अध्यक्ष अभिषेक लाठी यांच्यासह येणाऱ्या कालावधीत शिक्षण व क्रीडा अशा दोन्ही क्षेत्रांत आर. आर. विद्यालय, आर. आर. कनिष्ठ व वरिष्ठ महाविद्यालय, भा. का. लाठी विद्यामंदिर आणि न्यू इंग्लिश मीडियम स्कूलची उंची कशी राहील, त्या दृष्टीने विविध योजना राबविणार असल्याचे मुकुंद लाठी यांनी सांगितले. मुकुंद लाठींसह ज्येष्ठ सदस्यांच्या मार्गदर्शनाखाली खो खो, कबड्डी आणि बास्केटबॉलसाठी मैदाने सुसज्ज करण्यात येतील, असे नवनियुक्त अध्यक्ष अभिषेक लाठी म्हणाले.
Leave a Reply