रेखा यांनी हिंदी चित्रपटसृष्टीत प्रचंड यश आणि लोकप्रियता मिळवली आहे. त्यांचे वडील जेमिनी गणेशन आणि आई पुष्पवल्ली हे दोघेही प्रसिद्ध दाक्षिणात्य अभिनेते होते. किंग ऑफ रोमान्स म्हणून ओळखले जाणारे जेमिनी गणेशन त्यांच्या वैयक्तिक आयुष्यामुळेही चर्चेत राहिले. त्यांनी तीनदा लग्न केलं.
अभिनय कारकिर्दीची सुरुवात
जेमिनी गणेशन यांचा जन्म १७ नोव्हेंबर १९२० रोजी तामिळनाडूतील पुदुकोट्टाई येथे झाला होता. त्यांनी अभिनय कारकिर्दीची सुरुवात १९४७ साली आलेल्या मिस मालिनी या चित्रपटातील एका छोट्या भूमिकेतून केली. १९५२ साली आलेल्या थाई उल्लम या चित्रपटातील नकारात्मक भूमिकेमुळे त्यांना विशेष ओळख मिळाली.
त्यानंतर कलथूर कन्नम्मा, उन्नाल मुडियाम थांबी, वंजिक्कोट्टाई वलिबन, पार्थिबन कनावू, वीरपांडिया कट्टाबोमन, देवथा आणि मिसियम्मा यांसारख्या चित्रपटांमधून त्यांनी ओळख मिळवली. जेमिनी तमिळ, कन्नड, तेलुगू आणि हिंदी भाषांमधील २०० हून अधिक चित्रपटांमध्ये दिसले.
तीन लग्नं आणि कुटुंब
जेमिनी गणेशन यांचं पहिलं लग्न १९४० मध्ये वयाच्या २० व्या वर्षी अलमेलूसोबत झालं होतं. या जोडप्याला जयलक्ष्मी, नारायणी, रेवती आणि कमला अशा चार मुली आहेत. त्यानंतर पुष्पवल्लीसोबत काम करताना जेमिनी तिच्या प्रेमात पडले. दोघं नात्यात होते. लग्न न करताच जेमिनी आणि पुष्पवल्ली यांना रेखा आणि राधा या दोन मुली झाल्या.
नंतर जेमिनी अभिनेत्री सावित्री यांच्या जवळ आले. पुष्पवल्लीला त्यांच्या नात्याबद्दल समजलं आणि त्यामुळे त्यांचा ब्रेकअप झाला. जेमिनी यांनी १९५४ मध्ये सावित्रीशी दुसरं लग्न केलं. दुसरी पत्नी सावित्री यांचं १९८१ मध्ये निधन झालं. मृत्यूपूर्वी सावित्री १८ महिने कोमामध्ये होत्या. त्यांच्या मृत्यूनंतर सतरा वर्षांनी जेमिनी यांनी १९९८ मध्ये वयाच्या ७८ व्या वर्षी ज्युलियानाशी तिसरं लग्न केलं. ज्युलियाना त्यांच्यापेक्षा ३६ वर्षांनी लहान होत्या. जेमिनी यांचं २००५ मध्ये निधन झालं.
Leave a Reply